"Һуғыш беҙҙе, ҡолаҡтарҙан тартып, ваҡытынан алда өлгөрттө..."

Ғәмһеҙ генә уйнап, ата-әсәләренә иркәләнеп кенә үҫер саҡтарында улар иңдәренә хәҙерге ололар ҙа күтәрә алмаҫлыҡ ауырлыҡтар төшкән... 10-11 йәштән тормош арбаһына төптән егелеп, ҡатын-ҡыҙҙар, ҡарт-ҡоролар менән бергә Бөйөк Еңеүҙе яҡынайтыуға тиңһеҙ өлөш индергән улар. 1943 йылда төшөрөлгән был фотоһүрәттә Күгәрсен районының Сәйетҡол ауылы балалары. 10-12 йәшлек ошо малайҙар – Байрамғәли Сәйетбатталов (аҡ күлдәктә), Шәмсетдин Моҡанаев (алда ултыра), Заһир Абдуллин, Ғәтиәт Әхмәтғәлин (баҫып торалар) – һуғыш һәм һуғыштан һуңғы йылдарҙа иң ауыр эштәрҙе үҙ иңендә күтәрә.