Балсы ла, балыҡсы ла

Башҡорттар борон-борондан һунарсылыҡ, ҡортсолоҡ, балыҡсылыҡ, тора-бара малсылыҡ, игенселек менән ғаиләһен аҫраған, хәҙерге тел менән әйткәндә, үҙенә күрә бәләкәй эшҡыуарлыҡ менән шөғөлләнгән һәм шуға ла заманына күрә хәлле генә йәшәгәндәр. Дауыт –Ҡайып ауылының таулы –урманлы ерҙә урынлашыуы умартасылыҡ, һунарсылыҡ өсөн дә ҡулай. Шуғалырмы, был төбәктә һәр йортта тиерлек бал ҡорто тоталар. Шундайҙарҙың береһе – Фәнис Сәғитов. Уны ауылда, районда ғына түгел, республикала ла умартасы булараҡ яҡшы беләләр. Агросәнәғәт комплексында оҙайлы һәм намыҫлы хеҙмәте өсөн ул бихисап маҡтау грамоталары менән дә бүләкләнгән.

Фәнис ағай балыҡ тоторға ла ярата.

- Күптәр балыҡсыны эшһеҙлектән яфаланып, һыу буйында йөрөй, тип уйлай. Нишләтәһең, балыҡсы ҡомары ҡанда бит беҙҙең. Балыҡҡа тип сыҡҡан һәр кем ҙур балыҡҡа өмөт итә. Бынан бер нисә йыл самаһы элек 22 килолыҡ суртан тотҡайным. Һүрәттәгеһе 6 кг, - тиһә лә табышы менән артыҡ маҡтанмай, ир- аттарға хас баҫалҡылыҡ һаҡлай. Шулай ҙа был шөғөлдө бик яратыуы күренеп тора.