Мораҡ башҡорт гимназияһының беренсе класс уҡыусылары сафын Айтуған Ибраһимов та тулыландырҙы. Атанан күргән – уҡ юнған тигәндәй, “Уралҡай” балалар баҡсаһында тәрбиәләнгән малай бәләкәйҙән төрлө йәмәғәт сараларында ла әүҙем ҡатнаша, спорт менән дуҫ. Шашка уйындары буйынса конкурстарҙа урындар яуларға ла өлгөргән: балалар баҡсаһында “Иң яҡшы шашкасы” булып танылған. Ике йыл рәттән “Беҙ –Гагаринсылар” тип аталған интеллектуаль олимпиадала (мәктәпкәсә йәштәге балалар араһында) ҡатнашып, үҙе тәрбиәләнгән баҡсала 1-се урынға лайыҡ була, район буйынса иһә 3-сө урында еңеүсе тип билдәләнә.Бер туған һеңлеһе Наҙгөл менән улар башҡортса сатнатып шиғыр һөйләй, йырлай, бейей. Баланың теле туған телендә үҫешеүҙә, әлбиттә, ата-әсәнең, олатай-өләсәйҙең роле баһалап бөткөһөҙ. Илем, телем, милләтем тип янып торған йәш Ибраһимовтар ғаиләһе балаларын ысын мәғәнәһендә рухлы итеп тәрбиәләүгә ҙур көс һала.