+22 °С
Ямғыр
ЙӘМҒИӘТ
29 Апрель , 11:36
Мәңгелек йортто тәртиптә тотайыҡ!
Яҙ етеп ер ҡарҙан әрселеү менән Үрге Мөрсәләй ауылында урындағы мосолман зыяратын сүп-сарҙан таҙартыу маҡсатында өмә үткәреп, мәңгелек йортто тәртипкә килтереү матур йолаға әйләнеп китте. Бында һәр кемдең вафат булған туғандары, яҡын кешеләре ерләнгән. Баҡыйлыҡҡа күскәндәрҙең был донъялағы һуңғы урыны ул — зыярат. Быйыл да беҙҙең ауыл халҡы – Үрге Мөрсәләйҙә йәшәгән, ошонда тыуып үҫеп Салауат, Күмертау ҡалаларында, Мәҡсүт, Йомағужа ауылдарында тормош көтөүсе ауылдаштар - йәмғеһе 70-кә яҡын кеше был изге эшкә тәүгеләрҙән булып тотондо.
Мәңгелек йортто тәртиптә тотайыҡ!
Ата-бабаларыбыҙҙың, яҡындарыбыҙҙың, туғандарыбыҙҙың ятҡан мәңгелек йорто сүп-сарҙан, ҡороған ағастарҙан, сыбыҡтарҙан, үләндәрҙән таҙартылды. Күптәр үҙҙәренең яҡындарының ҡәберлектәрен йүнәтте, рәшәткәләләрен, ҡәбергә ҡуйған һәйкәлдәренең буяуҙарын яңыртты.
Күмәк кешегә эш сыҙаймы ни, ике –өс сәғәт эсендә ауылыбыҙҙың берҙәм, татыу ир-егеттәре һәм ҡатын-ҡыҙҙары эште еренә еткереп тә ҡуйҙы. Йыйыштырылған зыярат матурланып ҡалды.
Ауыл халҡы бындай өмәләрҙә һәр йыл бик теләп ҡатнаша. Бындай изге эштә йәштәрҙең күп булыуы айырыуса һөйөндөрә.
Ауылдың имам хатибы Марат хәҙрәт Исмәғилев әрүахтарҙың рухтарына бағышлап Ҡөръән аяттары уҡыны.,
Аҙаҡ өмәселәр Тәнзилә Ҡотлогилдина әҙерләгән тәмле ризыҡтар, ҡайнар сәй менән һыйланды. Матур табын әҙерләп, эшләгән халыҡтың күңелен күтәргән ҡатын-ҡыҙҙарыбыҙға ҙур рәхмәт!
Өмәлә ҡатнашыусыларҙың һәр береһенә “Афарин!”, тибеҙ, һәр ваҡыт берҙәм булайыҡ, мәрхүм ата-әсәләребеҙҙең, туғандарыбыҙҙың, ауылдаштарыбыҙҙың мәңгелек йортон тәртиптә тотайыҡ!
Азамат ҠОТЛОГИЛДИН.
