+28 °С
Болотло
ЙӘМҒИӘТ
30 Декабрь 2025, 06:19
Яңы йыл бүләктәрен кем отто?
Күптәр – балалар ғына түгел, өлкәндәр ҙә Яңы йылдан ниндәйҙер мөғжизә көтә. Күгәрсен мәғлүмәт үҙәге йыл да матур йола буйынса гәзит уҡыусылар араһында иң яратҡан байрам – Яңы йыл алдынан шәп бүләктәр уйната, шуның менән әүҙем гәзит уҡыусыларҙы дәртләндерергә, бүләктәр тапшырып, ҡыуандырырға ашыға. Иҫке йылдың һуңғы көндәрендә “Мораҙым” һәм “Кугарчинские вести” гәзиттәренә 2026 йылдың тәүге ярты йыллығына яҙылыусылар араһында Яңы йыл бүләктәре уйнатылды. Сарала беҙҙең гәзит уҡыусылар ҙа ҡатнашты, әсәһе менән килгән Софья исемле ҡыҙға лототрондан тылсымлы һандарҙы сығарып, бүләктәрҙең кем өлөшөнә төшкәнен асыҡлау кеүек ҙур бурыс йөкмәтелде.
Яңы йыл бүләктәрен кем отто?
Һүҙҙе оҙон-оҙаҡҡа һуҙмай ғына еңеүселәрҙең исемдәрен атайбыҙ: шулай итеп, “Мораҙым” гәзитен алдырыусылар араһында яңы йылдың символы – ат уйынсығын Мораҡтан Ғәлимә Байғазакова, таҫтамалдарҙы Ҡалдарҙан Сания Вәлитова, сәй йыйылмаһы менән таҡтаны Түбәнге Бикҡужанан Наилә Айҙарбәкова отто. Плед Мораҡтан Сулпан Әлмөхәмәтовҡа, икенсе плед Сулпан Ғәлинға, постель кәрәк-ярағы Хоҙайбирҙиндан Н.Р.Һөйөндөковаға сыҡты. Термопот Бикестән Сәйҙә Хәсәнованың өлөшөнә төштө. Яңы йылдың төп бүләге – ТЕЛЕВИЗОР Бикбулаттан Мәймүнә Иҫәнгилдинаға насип булды.
Шул уҡ көндө гәзитебеҙҙең тоғро дуҫы, даими уҡыусыһын ҡыуандырып, бүләгебеҙҙе үҙебеҙ алып барып тапшырҙыҡ.
- Гәзитте үҙемде белә-белгәндән алып, 70 йыл тирәһе алдырам. Яңы йылға, унан бигерәк тыуған көнөмә ҙур бүләк булды. Ғинуарҙа, Алла бирһә, 90 йәшемде тултырам, - тип ҡыуанды Мәймүнә инәй. – “Мораҙым”ды яратып уҡыйым, күҙем насарайып киткәс, операция ла эшләттем. Хәҙер, Аллаға шөкөр, күҙлекһеҙ уҡыйым. Бөтә яңылыҡтар, район хәлдәре менән гәзит аша танышып торам, - тип рәхмәттәрен әйтеп, бөтә редакция хеҙмәткәрҙәренә изге теләктәрен юлланы. Ә беҙ, үҙебеҙҙең хөрмәтле гәзит уҡыусыларыбыҙҙың һәр береһенә беҙҙең менән бергә булғандары, гәзитте алдырғандары, яратып уҡығандары өсөн оло рәхмәттәребеҙҙе еткерәбеҙ, ныҡлы һаулыҡ, шатлыҡ-ҡыуаныстар һәм бәрәкәтле тормош теләйбеҙ.
Күгәрсен мәғлүмәт үҙәге.
