+22 °С
Ямғыр
ЙӘМҒИӘТ
12 Декабрь 2025, 13:50
Зубрҙар ҙур ҡыҙыҡһыныу уята
Мораҙым тарлауығы биләмәһендә Белоруссиянан килтерелгән зубрҙар йәшәй башлағас паркка килеүселәр күбәйгән. Был хаҡта Башҡортостандың тәбиғәттән файҙаланыу һәм экология министры Нияз Фазылов Республикаға идара итеү үҙәгендә биргән интервьюһында белдергән. Бөгөн беҙҙә 23 зубр бар. Хайуандар үҙҙәрен яҡшы тоя, ҡар ятҡас та улар вольерға төшә. Паркка теләгән һәр кем инергә мөмкин.
“Мораҙым тарлауығы” тәбиғәт паркында ҡурсаулыҡ биләмәләрен һаҡлау буйынса инспекторҙарҙың эш көндәре, ҡайһы берҙә ҡатмарлы булһа ла, төрлө ваҡиғаларға бай һәм ҡыҙыҡлы. Бына кемдәргә бер ҡасан да күңелһеҙ түгел! Хайуандар өсөн мал аҙығы һала торған утлыҡсаларҙы, тағараҡтарҙы тикшерергә, улар ватылһа йүнәтергә, мал аҙығы, бесән, миндек һәм тоҙ ташырға, фотототҡостар ҡуйырға йәки ҡарарға, территория буйлап рейдтар үткәрергә... Былар, әлбиттә, инспекторҙар эшләгән эштәрҙең тулы исемлеге түгел.
Улар көн дә юлдарында бик күп ҡыҙыҡлы нәмәләргә тап була. Ана, ағастарҙың баштарында ҡорҙар ултыра. Ә бына бында икенсе күренеш: ҡондоҙҙар тырышып-тырмашып ағас олонон кимергән. Юлда зубрҙар аҙығы өсөн тәғәйенләнгән утлыҡса, ул буш тиерлек. Тимәк, улар, беҙҙең ҡеүәтле урман гиганттары, яҡында ғына йөрөй, көн дә “ашхана”ға һуғыла.
Инспекторҙар зубрҙар өсөн кишер, картуф һәм башҡа тәм-томдар алып килгән. Артабан уларға башҡа урындарҙағы утлыҡсаларға барырға кәрәк, сөнки мышы, ҡабан, ҡабан, ҡуян да үҙ “өлөшө”н көтә.
Паркта йәшәүселәр инспекторҙарҙан ҡурҡмай, урманға кемдең һәм ни өсөн килгәнен еҫ буйынса алдан уҡ тойоп тора. Хайуандар белә: был изге күңелле кешеләр уларға яҡшы ҡышларға, һыуыҡтарҙы еңел үткәрергә ярҙам итәсәк!
Гөлназ ТУЙМӨХӘМӘТОВА, “Мораҙым тарлауығы” тәбиғәт паркы методисы.
