Холестеринды нисек кәметергә икәнен беләһегеҙме?

1. Йүкә сәскәһе дөйөм холестеринды кәметеү һәләтенә эйә, ти белгестәр. Өҫтәмә сифаттарына ҡан баҫымын бер аҙ түбәнәйтергә һәм организмдан артыҡ шыйыҡсаны сығарырға булышлыҡ итеүен индерергә мөмкин.

 Күптәр йүкә сәскәһен сәй итеп эсә. Өй шарттарында сәй әҙерләү өсөн киптерелгән 2 ҡалаҡ сәскәгә 500 мл ҡайнар һыу ҡойорға кәрәк. 20 минут самаһы төнәтергә. Сәй бүлмә температураһына тиклем һыуынырға тейеш.

 Тәүлегенә 2-3 тапҡыр 150-200 мл эсергә кәңәш ителә.

1. Һарымһаҡ та холестеринды кәметә, ти белгестәр. Ундағы С, D, Р һәм В төркөмө витаминдары, эфир майҙары, микро - һәм макроэлементтар (магний, цинк, фосфор, тимер, кальций, йод) кеше организмы өсөн бик файҙалы.
2. Имбир тамырында организмдағы холестерин алмашыныуын нормалләштереүсе уникаль матдәләр бар, тиҙәр. Имбир төнәтмәһен әҙерләү өсөн бер киҫәк ваҡланған тамырын 600 мл ҡайнар һыуға һалып, әкрен генә утта 20-25 минут ҡайнатырға. Эмаль һауыт-һаба ҡулланыу яҡшыраҡ. Көнөнә 5-7 тапҡыр 50 мл самаһы ҡулланырға кәрәк. Ҡырғыста ҡырып, сәйгә ҡушып, баллап та эсергә була.
3. Етен орлоҡтары шулай уҡ холестеринды кәметеү үҙенсәлегенә эйә.

“Етен майы омега-3 май кислотаһы булған альфа-линоль кислотаһына бай. Дислипидемия һәм атеросклероз булған кешеләрҙә етен дөйөм холестеринды кәметеүгә булышлыҡ итә. Иң яҡшыһы - етен майын ҡулланыу. Уны дарыуханаларҙан һатып алырға кәңәш ителә. Ҡабул итеү схемаһы: тәүлегенә 3 тапҡыр 1-әр балғалаҡ. Дауалауҙың максималь оҙайлығы - 21 көн. Май тәмһеҙ тойолһа, ниндәй ҙә булһа емеш киҫәге (алма йәки мандарин) менән бергә ҡулланырға мөмкин.

Көндәлек ризыҡтарға блендерҙа ваҡланған н етен орлоҡтарын өҫтәү ҙә файҙалы”, - тип яҙыла медицинаға ҡағылышлы гәзиттә.

6. Лимон, хатта уның ҡабығы менән һуты ла бик файҙалы. Лимонды организмда холестерин алмашыныуына йоғонто яһаусы башҡа аҙыҡ-түлек, мәҫәлән, һарымһаҡ менән бергә ҡулланырға ла була.
7. “Һоло төнәтмәһе холестеринды кәметә, сөнки унда полисахаридтарҙың айырым төркөмө бега – глюкандар бар. Америка тикшеренеүҙәренең береһе буйынса, тап улар “хәүефле” холестеринды 9 процентҡа тиерлек, дөйөм холестеролды 4 процентҡа кәметеүгә булышлыҡ итә”, - ти белгестәр.

 Уны төрлөсә әҙерләргә була. Бер рецепт: 200 г һолоны йыуғас, өҫтөнә 1 литр һыу ҡойоп, әкрен генә утта 45-60 минут ҡайнатырға. Ашарға 30 минут ҡалғас, тәүлегенә 2-3 тапҡыр 1/3 стакан ҡулланырға кәңәш ителә.

8. Грек сәтләүеге һәм уның йәшел ҡайыры ла бик файҙалы. Уны ҡулланыу рецебы: 1 кг таҙартылған сәтләүекте ит турағыс аша 2-3 тапҡыр үткәрергә. Ҡатышманы тығыҙ ҡапҡаслы быяла банкаға һалырға. Һалҡын урында (һыуытҡыс) һаҡларға. Ашауға 20-25 минут ҡалғас, көн һайын 5-6 тапҡыр берәр балғалаҡ ҡабул итергә. Дауаланыу ваҡыты - 30 көн.

  Дарыу препараттарын йәки халыҡ медицинаһы ысулдарын ҡулланыу холестеринды кәметеүгә килтерә. Әммә йәшәү рәүешен һәм рационды төҙәтеү ҙә кәрәк. Организмда липидтарҙың адекват алмашыныуын тергеҙеү өсөн Рәсәй Кардиология йәмғиәте түбәндәге тәҡдимдәрҙе үтәргә тәҡдим итә: кәүҙә ауырлығын тотоу, йәғни артыҡ һимермәү; физик әүҙемлек; күнекмәләр эшләү; йәйәү йөрөү; дөрөҫ туҡланыу; тоҙҙо аҙыраҡ ҡулланыу (көнөнә 5 грамдан да артмаҫҡа тейеш); тәмәке тартмау, алкоголле эсемлектәрҙән баш тартыу.

Иҫкәрмә. Бөтә кешенең дә организмы бер төрлө түгел: кемгәлер яраған ысул икенсе берәүгә  килешмәҫкә мөмкин. Шуға ла өҫтә яҙылғандарҙы ҡулланыр һәм һынап ҡарар алдынан белгес менән кәңәшләшеү мотлаҡ!

Гөлназ СӘЙЕТБАТТАЛОВА әҙерләне.