Уҡыусылар өсөн премия булдырыласаҡ!

 Урал Таһир улы кескәй яҡташтарын тәүгә генә ҡыуандырмай, ул был матур йоланы 2012 йылда уҡ башлай. Тәүҙә тыуған ауылы Һатлыҡтағы 1-се класс уҡыусыларына мәктәп кәрәк-яраҡтары бүләк итә.
Өс йыл элек иһә Һатлыҡта тәүге тапҡыр мәктәпкә барыусылар булмағас, шул йылдан алып, Юлдыбай ауыл биләмәһенә ҡараған 7 ауылдың 1-се класс балаларына бүләк тапшыра.
- Быйыл 7 ауылдан бары тик 5 бала ғына тәүге тапҡыр мәктәпкә бара, был - аяныс. Әммә шуларҙың өсәүһе - Һатлығымдан! Быныһы инде ҡыуаныс, - тип ауылдарҙа йылдан-йыл балалар һанының кәмей барыуына борсолоу белдерҙе Урал Таһир улы. 

Ул ауыл биләмәһе активы, район хакимиәте, йәмәғәт ойошмалары вәкилдәре, уҡыусылар  менән осрашыуҙа үҙенең күптән түгел вафат булған беренсе уҡытыусыһын – Башҡортостан Республикаһының мәғариф алдынғыһы, 46 йыллыҡ хеҙмәт стажының 38 йылын балаларға белем биреүгә арнаған Ишмәтов Ирек Рәхмәт улын оло хөрмәт менән телгә алды.

 “Ул уҡыусыларына белем биреп кенә ҡалманы, ә оло тормошҡа әҙерләне”, - тине ул. Әйткәндәй, Урал Таһир улы ҡыуаныслы яңылыҡ та еткерҙе: остазының исемен мәңгеләштереү маҡсатында ул Яңы Хвалын мәктәбенең сығарылыш класс уҡыусылары өсөн Ирек Ишмәтов  исемендәге премия булдырасаҡ.