“Уралҡай”ҙа матур саралар үтә

Махсус хәрби операцияла ҡатнашыусы яугир атай менән осрашыу ҙа балалар күңелендә онота алмаҫлыҡ тәъҫораттар ҡалдырҙы. Яугирҙарға гуманитар ярҙам йыйыуҙа ла ата- әсәләрҙең ярҙамы баһалап бөткөһөҙ.Был саралар тәрбиәселәрҙе, ата–әсәләрҙе һәм балаларҙы берләштерә һәм уларҙы милли рухлы, илһөйәр, телһөйәр  итеп тәрбиәләүгә юл һала.

 Яңыраҡ балалар баҡсаһында “Ғаилә – мөхәббәт иле” тигән тағы бер матур сара үтте. Байрамды “Аҡ сәскә” төркөмө үткәрҙе. Сарала балалар ғаилә тураһында йомаҡтар систе, йырҙар йырланы,уйындар уйнаны һәм матур итеп бейеп тә күрһәтте. Иң ҡыҙығы, атай - әсәйҙәр менән бергәләп, башҡорт халыҡ милли  итектәрен биҙәү булғандыр. Был итектәр, ғаилә йылының йылы иҫтәлеге булып, балалар баҡсаһының музейында һаҡланасаҡ. Байрам Фәниә Дауытова ижад иткән “Ғаилә – мөхәббәт иле” йыры  менән тамамланды. Ғаилә һөйөүҙән ярала. Ошо һөйөүҙән матур балалар тыуа. Ысынлап та, ғаилә мөхәббәт иле! Һәр ғаилә тулы, балалар атай–әсәйле булһын! Һәр өйҙә балаларҙың шат тауыштары яңғырап торһон! Илдә тыныслыҡ булһын!

Гәүһәр БОЛҒАИРОВА, “Уралҡай” балалар баҡсаһының                                      башҡорт теле уҡытыусыһы.