Ярты быуат үткән ярты йылдай...

  Күрше Көйөргәҙе районының Маяҡ ҡасабаһындағы данлыҡлы мәктәп-интернатын  1954 йылда тамамлаған егет-ҡыҙҙар быйыл Мораҡ ауылында осрашты.

  Был сараны 10-сы “Б” класының әүҙем ҡыҙҙарының береһе булған , хәҙер инде Башҡортостандың атҡаҙанған уҡытыусыһы Нафиҡова Венера Сәлмән ҡыҙы ойошторған.

 Һабаҡташтар осрашыуға ҡәҙерле остаздарын  – рус теле һәм әҙәбиәте уҡытыусыһы Байморатов Вәли Ғәбит улы менән химия уҡытыусыһы Фатима Муллағәли ҡыҙын да саҡырған.

 Матур хеҙмәт һәм ғүмер юлы үткән ағай-апайҙар: гөрләтеп донъя көткән, балалар үҫтергән,  үҙ эшен яратып, намыҫ менән башҡарған. Улар араһында уҡытыусылар, китапханасы, балалар баҡсаһы, почта етәкселәре, инженер-технолог, химзаводта мастер-лаборант, ауыл Советы идарасыһы, музей хеҙмәткәре, механизатор-комбайнсы, шоферҙар, слесарҙар, Себер яҡтарында эшләп хаҡлы ялға сыҡҡандар бар. Ҡартай-ҡәрсәй, олатай- өләсәй булыу бәхетен татығандар.