Гәзитле лә, бүләкле лә булды

Гүзәл Миңлеғәли ҡыҙы менән Әхмәтйән Хәкимйән улы Вәлитовтар гәзитебеҙҙең күптәнге дуҫтары. Гүзәл апай 9 йыл ауыл клубын етәкләгән, оҙаҡ йылдар “Октябрь”совхозының иҡтисад бүлегендә эшләгән, әлеге көндә хаҡлы ялда, баҡса үҫтереп, яҡындарын тәмле-татлы ризыҡтар менән һыйлап, тормоштоң һәр көнөнән йәм табып йәшәй ул. Ғаилә башлығы инженер, механик булған, байтаҡ йылдар Мәҡсүт ауыл биләмәһе башлығы вазифаһын башҡара.

 Татыу ғаилә өс бала үҫтергән: Салауат улдары полиция хеҙмәткәре, кәләше Эльвира менән ике балаға ғүмер биргән; Светлана ҡыҙҙары – педиатр, ул да ике бала әсәһе; Алһыу ҡыҙҙары быйыл 9-сы класты тамамлаған. 

 Бик уңған ғаилә улар, баҡса тултырып йәшелсә-емеш үҫтерәләр, һыйыр, йылҡы малы аҫрайҙар, ҡорт тоталар.

- Үҙебеҙҙе белә-белгәндән алып гәзиттән айырылғаныбыҙ юҡ. Был юлы гәзитле лә, бүләкле лә булдыҡ. Төп приздың нәҡ беҙгә насип булғаны - беҙҙең өсөн көтөлмәгән ҡыуаныс! Артабан да “Мораҙым”дан айырылмаҫбыҙ, - ти Гүзәл апай.