+28 °С
Болотло
ЙӘМҒИӘТ
16 Ноябрь 2022, 04:28
Ағинәй юлы: Оло Эйек буйынан - Наҡаҫҡа
Милли мәҙәниәт һәм рухи мираҫ йылына арналған эстафета ағинәйҙәр ҡорон туплап, йөкмәткеле саралар сылбырын теҙеп, район буйлап атлауын дауам итә. “Оло Эйек буйы” ҡыҙҙары башлап ебәргән рухиәт байрамы Наҡаҫ буйына ла барып етте. Гәзитебеҙҙең үткән һандарының береһендә яҙыуыбыҙса, сирбайҙар сылбыр осон сәлихтарға тапшырғайны. Ҡырпағайҙың 14-се көнөндә Мәҡсүт, Үрге Мөрсәләй, Сирбай, Исем, Тәүәкән ағинәйҙәрен Сәлих ауылының “Әхирәттәр” клубы ҡатын-ҡыҙҙары йыйып алды.
Ағинәй юлы: Оло Эйек буйынан - Наҡаҫҡа
Ауыл клубы бәләкәй һәм иҫке генә булһа ла, сәлихтар нисектер ҡот ҡундырған, нур уйнап торғандай был мәҙәниәт усағында. “Айыҡ ауыл-2021” республика конкурсында ҡатнашҡанда эшләп ҡуйған этник мөйөштәре лә дан: ниндәй сара үткәрһәләр ҙә, сәхнә күркәм өй мөйөшө һымаҡ итеп биҙәлгән.
Ҡунаҡтарҙы шау-гөр килеп сәлихтар ауыл осонда ҡаршыланы. Гармунсылар дәртле бейеү көйҙәрен уйнап, халыҡты бейетеп, сараның матур үтәсәгенә орлоҡ һалып ҡуйҙы. Ҡайһы берәүҙәр был ауылды тәүгә күрә. Бәләкәй генә булһа ла, төҙөк, күркәм йорттары менән балҡып ултырған ауылға һоҡланмайса булмай. Конкурста икенсе урын яулап алған 2 млн 500 меңлек сертификатты файҙаланып, ауыл урамдарына асфальт түшәткәндәр.
“Урындағы башланғыстарҙы яҡлау” программаһы буйынса төҙөп ултыртҡан балалар майҙансығы ла ауылдың киләсәкле булыуына ишаралай. “Йәй буйы тауыш тынманы, гөрләп торҙо. Ауыл балалары ла, өләсәй-ҡәртәсәйҙәренә ялға ҡайтҡан балаларға ла дан булды. Ҡар яуғас та, ошонда сығып ҡар бабай яһап ултырҡайнылар әле”, - ти инәйҙәр.
Тулы мәҡәлә район гәзитендә донъя күрер.
Автор фотолары.
