Үҙ ерен нурлап йәшәүсе уңғандар

 Бик иртә атай наҙынан мәхрүм ҡалып, үҫмер сағынан әсәһенә терәк булып, ауыр эшкә өйрәнеп буй еткерә ул. Уҡыуға әүәҫ булһа ла, юғары белем алырға мөмкинлеге булмай. 1974 йылда йәненә яҡын Бикбулат ауылына килен булып төшә. Зәйнәғәбтдин Сәйфетдин улы менән ҡауышҡас, тәүге ун йылда тормош юлдашының ата-әсәһе менән бер ҡыйыҡ аҫтында татыу ғүмер итә. Ә 1983 йылда үҙҙәренә башҡа йорт һалып сыға Баймырҙиндар. Рәмзиә Шәрифулла ҡыҙы һауынсы һөнәрен дә үҙ елкәһендә татый, “КБО”ла, хаҡлы ялға сыҡҡансы 11 йыл Урал ауыл советында эштәргә идара итеүсе вазифаһын намыҫ менән башҡара. Тормош иптәше лә эшкә бөтмөр була – тракторист, көтөүсе булып эшләй. Олпат йәшкә баҫҡас та, һаман да ғүмер көҙҙәренә бирешмәйенсә, дәрт-ялҡынлы йөрәк, сәм менән донъя көтә – баҡса үҫтерә, ишле мал, көтөү-көтөү ҡаҙ, күркә аҫрай уңғандар. Рәмзиә апай ҡул эштәренә лә, бешеренергә лә оҫта.

 Булдыҡлы Баймырҙиндарҙың балалары ла – Гүзәл, Диләрә, Радик бәләкәстән эшкә өйрәнеп, һәр нәмәгә әүәҫ булып үҫә. Һәр ҡайһыһы һөнәрле, ғаиләле. Әйткәндәй, әсәһенә оҡшап ҡунаҡсыллығы менән хайран иткән өлкән ҡыҙҙары Гүзәл һәм һөйөклө килендәре ҡаҙ өмәһенән дә ситтә ҡалманы. Ҡунаҡтарҙы, аҙаҡ өмәселәрҙе милли ризыҡтарҙан һығылып торған бай табынға әйҙүкләп, самауыр сәйе, тәмле былау менән һыйланы.

 Гөрләп үтеп, Бикбулат ауылының егәрле ҡатын-ҡыҙҙарын берләштергән ҡаҙ өмәһенән һуң Баймырҙиндарҙың нурлы йорт-ҡураларына тағы ла бәрәкәт өҫтәлһен, ҡот яуһын, бәхет-ҡыуаныстар ишелһен!