+28 °С
Болотло
ЙӘМҒИӘТ
10 Ноябрь 2022, 04:36
Өмөтбайҙа ҡаҙ өмәләре гөрләне
Өмөтбайҙар, ергә ныҡлап ҡар ятҡанын көтөп тә тормайынса, ең һыҙғанып эшкә тотонған. Халҡыбыҙҙың уңғанлығын сағылдырыусы матур йола ул – ҡаҙ өмәһе. Унда кешеләр бер-береһе менән күрешеп, ихлас аралашып күмәк эш башҡара, ә аҙаҡ мул табын артында хәләл тәғәм-ризыҡтан ауыҙ итә. Ошо көндәрҙә Ибраһим (Өмөтбай) ауылында был төбәктең иң-иң уңғандары - Фәниә менән Муса Нарбиковтар, Ләлә менән Ғәзиз Абдуллиндар, Әлфиә Арыҫланова, Фәнүзә менән Илдар Ғәҙелбаевтар, Рәзилә менән Рәмзил Хәлиловтар, Рәсимә Көмөшҡужина менән Айҙар ағайҙың йорт-ихаталарында ҡаҙ өмәләре гөрләп үтте. Флүрә менән Руслан Тайляковтар ҙа күпләп ҡаҙ аҫрай. Тимәк, алда өмәләрҙең тағы ла гөрләһе бар әле.
Өмөтбайҙа ҡаҙ өмәләре гөрләне
Элгәре ҡәрсәйҙәр, апай-инәйҙәр көтөү-көтөү ҡаҙ аҫрап, ергә ап-аҡ ҡар ятыу менән бер-береһен өмәгә ҡаҙ йолҡошорға саҡырыр ине. Беҙгә, бәләкәстәргә лә, эш етәрлек була торғайны. Ҡаҙ тәпәйен, башын тырышып-тырмашып таҙартып, уның өсөн өлкәндәрҙән “маладис” һүҙен ишетеп түбәләрҙең күккә тейгәне бөгөнгөләй хәтерҙә.
Дөрөҫ, был эшкә хәҙер кескәйҙәрҙе бик йәлеп итмәйҙәр. Шулай ҙа ҡаҙ өмәләре элеккесә шау-гөр үтеп, күрше-күләндәрҙе, туған-тыумаса, ауыл кешеләрен берләштерә һәм күмәк эштең ырамлы булыуын иҫбатлап тора.
