+28 °С
Болотло
ЙӘМҒИӘТ
10 Октябрь 2022, 11:14
Ялсы ауылының рухи тотҡаһы улар
- Эй, рәхмәт яуғыры! Хоҙайға мең рәхмәт, “Мораҙым”дың тырыш ҡыҙҙары менән күрешергә лә насип итте... Шундайыраҡ ихлас һүҙҙәре, яҡты йөҙҙәре менән ҡаршы алды беҙҙе Иртөбәк ауыл биләмәһенә ҡараған Ялсы ауылында йәшәүсе Мәүлиҙә һәм Факил Сәғитовтар. Ауырлыҡтар, һуғыш михнәте менән сыныҡҡан ныҡлы, рухлы быуындан улар. Фекер ҡеүәһе, хәтер шәплеге, тормошҡа сәме менән йәштәргә биргеһеҙ өлкәндәр баҫмабыҙҙың тоғро дуҫтары ла. “Т-150” тракторы штурвалынан ике йыл элек кенә айырылып, әлеге ваҡытта “Иртөбәк” агрофирмаһының малсылыҡ комплексында ҡарауылсы булып эшләүсе Факил Хаммат улын туғыҙынсы тиҫтәһен ваҡлай тип уйламаҫһың да!.. Тәүҙә Бөрйәндә “Фрунзе”, (тыумышы менән ул айыуҙар төбәгенән!), 1987 йылдың йәйендә ғаиләһе менән Күгәрсен еренә күсеп төпләнгәндән бирле “Сеятель” колхозы, “Иртөбәк” агрофирмаһы баҫыуҙарын ҡыҙырған ир аҫылының алдынғы механизатор тигән даны бар.
Ялсы ауылының рухи тотҡаһы улар
Мәүлиҙә инәй төптән Ғафури районы Сәйетбаба ауылынан. Хеҙмәт юлын үҙенең тыуған ауылында башлаған уҡытыусыға Миәкә, Архангель, Ишембай, Бөрйән... – ниндәй генә район мәктәптәрендә эшләп, көс һынарға тура килмәгән. Һөйөклөһө менән Ялсы ауылын ғүмерлеккә төйәк иткәс, хаҡлы ялға сыҡҡансы Семен-Петровский урта мәктәбендә уҡыта. Күпме быуын балаларына йөрәк йылыһын берҙәй өләшеп, сифатлы белем биреп, иңдәренә ҡанат ҡуя, уларҙы ҙур тормош юлына баҫтыра. Уҡытыусының изгелеген уҡыусылары һаман да онотмай, һөнәри байрам көндө үҙен ихлас ҡотлап уны ихтирам-хөрмәткә сорнай.
Халыҡ мәнфәғәте өсөн йәнен аямаған Мәүлиҙә менән Факил Сәғитовтар дүрт балаға ғүмер бүләк итеп, уларҙы илебеҙҙең лайыҡлы ул-ҡыҙҙары итеп үҫтерер өсөн ҙур тырышлыҡ һала. Ҡыҙҙары – Гөлнара, Рәсимә әсәләренә оҡшап мәғариф өлкәһендә эшләй, Салауат ҡалаһында йәшәгән Айгөлдәре - полиция майоры. Иң кесеһе, ата-әсәһенең уң ҡулы, терәге булған Фазыл, ҡыҙғанысҡа ҡаршы, яҡты донъяларҙан бик йәшләй китә. Кинйәләрен юғалтыу ғазабынан, яҙмыш рәхимһеҙлегенән әрнеп тә, тормошҡа, кешеләргә булған оло мөхәббәтен, йәшәүгә сәмен һүрелтмәй улар. Йән төбәгенә әүерелткән Ялсы ерен йәмләп, был төбәктең рухи тотҡаһы булып йәшәй уңғандар.
