Еребеҙҙе нурлап, Күгәрсен балын данлап

 Урал Әмир улы ишле ғаиләлә тыуып, “өҫтәлдә бал булһа, балалар ас булмаҫ” тип ике-өс умарта ҡорт тотҡан әсәһенән бәләкәстән умартасылыҡ серҙәренә төшөнөп үҫә. Йөрәк өйәнәге менән тыуған малай 4-се республика художество мәктәп-интернатында уҡығанда үҙ алдына ҙур маҡсаттар ҡуя: “Сирҙе еңергә, Ватан алдындағы изге бурысты мотлаҡ үтәргә!” Ныҡышмаллығы менән сәләмәтлеген яҡшыртып һалдат итеген дә кейә, Башҡорт дәүләт педагогия институтының художество-графика факультетында уҡып диплом да ала. Ғүмерлек йәрен дә, Әлшәй районы һылыуын, интернатта уҡығанда осрата; бер-береһенә ғашиҡ йәрҙәр бер үк институтҡа һәм факультетҡа уҡырға инә, студент саҡтарында ҡауыша. Мәҡсүткә килен булып төшкәс, Рәмзиә Фәзрахман ҡыҙы мәктәпкә хеҙмәт, рәсем дәрестәрен уҡыта башлай, ә Урал Әмир улы ауыл хужалығы, ҡортсолоҡҡа ынтыла... Егәрле ата-әсә үҙ өлгөһөндә ике балаһын да тырыш, ныҡышмал итеп үҫтерә. Ләйлә менән Эльдар икеһе лә юғары белемле, һөнәрле; тормошта ла, бизнеста ла ата-әсәһенең уң ҡулы, ныҡлы терәге булып тора улар.

 Ҙур крәҫтиән-фермер хужалығы тотҡан уңғандар ауыл эшенән, айырыуса баллы шөғөлдән йән сихәте, рухи кинәнес алып йәшәй. Башҡорт балы, Күгәрсен балының данын тирә-яҡҡа таратыуҙа тап Хәбибуллиндар кеүек намыҫлы, егәрле, ысын һөнәрмәндәрҙең роле баһалап бөткөһөҙ!