Рәмил Йәнбәктең тыуыуына - 70 йыл

"...Рәмил Йәнбәк ысын мәғәнәһендәге йәшлек, мөхәббәт йырсыһы булды. Матурлыҡҡа, гүзәллеккә мөнәсәбәтен ул туп-тура егеттәрсә белдерҙе. Беҙ уны яратып, уларҙың яҡтарында әйтелгәнсә, Рәмил абзый тип атап йөрөттөк.

Күпмелер ваҡыттан һуң ул саҡтағы йәш, хәҙер 60 йәшен тултырған композитор Айрат Ғайсин менән йәш шағир Дамир Шәрәфетдинов, Айраттың йырҙарын башҡарыусы йырсылар Райман Ишбаев менән Харис Шәрипов беҙҙең төркөмгә ҡушылды. Рәмил ағай уларҙы ла ҡиәмәтлек ҡусты  итте. Ул барыбыҙға ла тигеҙ ҡараны, яҡын күреп “мырҙам” тип өндәште. Тап шул йылдарҙа Айрат уның шиғырҙарына байтаҡ ҡына йырҙар, шул иҫәптән “Әсәкәйем” көйөн ижад итте. Был йыр беҙҙең түңәрәктең гимнына әүерелде.

1990 йылда Рәмил ағай “Башҡортостан пионеры”ның баш мөхәррире саҡта гәзиттең 60 йәшлек юбилейы уҙғарылды. Абзый мине лә байрамға саҡырҙы. Сараға Татарстандан баш мөхәррирҙең дуҫы шағир Роберт Миңнуллин да килгәйне. Шағир менән тәү тапҡыр шунда осрашып таныштым.

1995 йылда Рәмил ағай беҙҙе, Айрат Ғайсин менән икебеҙҙе тыуған ауылына “Һаумыһығыҙ” ауылдаштар! “ байрамына алып ҡайтты. Күгәрсен районының Дауыт-Ҡайып ауылын да күреү бәхете шул саҡта беҙгә йылмайғайны. Абзыйҙың туғандары, ҡасандыр ағайыбыҙ эшләп киткән “Ҡыҙыл байраҡ” колхозы рәйесе Рамаҙан Әбдрәхимов менән танышыу ҙа яҡты хәтирәләр ҡалдырҙы..."

Әхмәр Ғүмәр -Үтәбай.