+28 °С
Болотло
ЙӘМҒИӘТ
22 Апрель 2022, 11:25
Тырышлыҡтары - төбәк һәм халыҡ мәнфәғәте өсөн
Бөгөн район мәҙәниәт һарайында һөнәри байрамдары уңайынан урындағы үҙидара органдары хеҙмәткәрҙәре, район һәм ауыл биләмәләре Советтары депутаттары, тармаҡ ветерандары ҡатнашлығында ҙур байрам сараһы үтте. Район хакимиәте башлығы вазифаһын башҡарыусы Азамат Сәйфуллин тантана сәбәпселәрен тәбрикләп, төрлө йылдарҙа райондың үҫешенә тос өлөш индергән ветерандарға оло рәхмәтен еткерҙе. Һуғыштан һуңғы осорҙа ярым емерек ауылдарҙы, төбәкте төҙөкләндереү өсөн ҙур тырышлыҡ һалған, 80-селәрҙә фиҙаҡәр хеҙмәт күрһәткән етәкселәрҙең исемдәрен ихтирам менән телгә алып үтте. Болғансыҡ 90-сыларҙа һәм артабан үҙен район халҡы мәнфәғәтенә бағышлағандар ҙа иғтибарҙан ситтә ҡалманы. Ғайса Янбаев етәкселек иткән осорҙа район ерлегендә ҙур эштәр башҡарылыуын, айырыуса район үҙәгенең күркәмләнеүен, төҙөкләндерелеүен билдәләп үтергә лә онотманы.
Тырышлыҡтары - төбәк һәм халыҡ мәнфәғәте өсөн
Әлеге ваҡытта тырыш хеҙмәте менән айырылыусылар, эшендә уңыш ҡаҙанғандар маҡтау һәм рәхмәт хаттары менән бүләкләнде.
Бар биләмә башлыҡтары исеменән сығыш яһаусы Ялсы ауыл советы башлығы Ирек Юдаев, ветерандар исеменән һүҙ тотҡан Тамара Нилова был байрамдың әһәмиәтен, урындағы үҙидара органдары хеҙмәткәрҙәренең урындағы халыҡтың төп терәге булыуын һыҙыҡ өҫтөнә алды.
1989-1991 йылдарҙа район Советы башҡарма комитеты рәйесе вазифаһын намыҫ менән башҡарған Петр Неженскийҙың сығышы айырыуса ихлас, ялҡынлы булды.
- Икеләтә байрам бөгөн. Владимир Ильич Лениндың тыуған көнө, - тип, бөйөк юлбашсыға бағышлаған шиғырын уҡып ишеттерҙе ул.
Район мәҙәниәт һарайы артистары тарафынан әҙерләнгән музыкаль бүләк тантанаға тағы ла байрам төҫө өҫтәне.
