+28 °С
Болотло
ЙӘМҒИӘТ
23 Март 2022, 10:45
Метеорологтарҙың эше еңелме?
Бөгөн – Бөтә донъя метеорология һәм Рәсәй гидрометеорология хеҙмәте көнөндә, әлбиттә, күрер күҙгә күренмәҫ, әммә ҡатмарлы һәм мауыҡтырғыс эш менән мәшғүл булған һөнәр эйәләрен телгә алып үтке килә. Мораҡ метеостанцияһы коллективы ҙур түгел, ни бары биш гүзәл заттан тора. Метеостанция начальнигы вазифаһын ваҡытлыса башҡарыусы Линина Елена Павловна (фотола), техник метеорологтар – Галина Федюнина, Светлана Сокольниковаларҙың был өлкәлә эшләүенә яҡынса утыҙ йыл хәҙер. Йәшлегендә Мәскәү метеорология техникумында төплө белем алған Любовь Дауытованың да тыуып үҫкән ерендә яратҡан эшен башҡарыуына ун ете йыл булған. Агрономдар менән тығыҙ бәйләнештә тороп, намыҫлы хеҙмәт күрһәтеүсе агрометеоролог Рәмзиә Аритҡолова метеостанцияға эшкә 2014 йылда килгән. Намыҫлы эшсәндәр бөтәһе лә ике, йәки унан артыҡ бала тәрбиәләгән изгелекле әсәләр; өлгөлө, матур ғаиләләрҙең рухи терәге булып тора улар.
Метеорологтарҙың эше еңелме?
Метеорологтар даими рәүештә ел тиҙлеген, ҡарҙың бейеклеген, тығыҙлығын, ундағы һыу запасын үлсәп, һауа торошон, яуым-төшөмдө күҙәтеп һәр мәғлүмәтте көн һайын, ҡайһы берен өс сәғәт һайын баш ҡалаға хәбәр итеп тора, таблица рәүешендә ҡағыҙға теркәп, компьютерға индереп бара. Быныһы беҙҙең күҙгә күренгән эштәре, бурыстары ғына. Күпме кешегә ярҙам ҡулын һуҙғандары, изгелек эшләгәндәре хаҡында, моғайын, күптәр хәбәрҙарҙыр.
Улар менән тығыҙ хеҙмәттәшлек иткән гидролог Геннадий Лининдың иңдәренә яҙғы ташҡындар мәлендә айырыуса ҙур яуаплылыҡ ята. Һыу күтәрелеүен даими күҙәтеү аҫтында тотоп, метеостанцияға хәбәр итә.
Мораҡ метеостанцияһы эшсәндәре был өлкәнең хөрмәтле ветерандары Александра Линина һәм Марина Чернышеваға оло хөрмәт менән ҡарай, уларҙың кәңәштәренә ҡолаҡ һала.
Ғәҙәттән тыш хәлдәр министрлығынан килгән “штормлы” иҫкәртеүҙәр (боҙлауыҡ, ҡойма ямғыр, ел-дауыл, йәшен һ.б.) күп бәлә-ҡазаны кисектереү өсөн нигеҙ булып тора. Метеостанция хеҙмәткәрҙәре лә был юҫыҡта даими эш башҡарып, халыҡтың хәүефһеҙ, имен тормошон тәьмин итеүгә тос өлөш индерә.
