+28 °С
Болотло
ЙӘМҒИӘТ
23 Март 2022, 06:00
Көслө рухлы, сабыр, тырыштар
Тауҙар ҡуйынына һырылып ултырған, серле Эйек моңдарына иҙрәгән йәмле Мораҙым ауылы үҙенең йомарт күңелле, тырыш, көслө рухлы кешеләре менән дан тота. Һүҙебеҙ ҙә бөгөн шул төбәктең ырыҫын һаҡлап, күркәм булмыштары менән уға йәм биреп йәшәүсе Гөлсиә менән Илфат Ҡотлогилдиндар хаҡында. Мораҙым ауылында тыуып үҫкән Илфат Исмәғил улының Мәләүез районы һылыуы Гөлсиә Тимерхан ҡыҙы менән ҡауышып, бергә-бергә татыу ғүмер кисереүенә өс тиҫтәгә яҡын йыл уҙған. Матур парҙың үтелгән юлдары шатлыҡ-һөйөнөстәрҙән генә тормай. Ғазаплы минуттар, һынауҙар менән дә нығынған уларҙың ғаилә ептәре, саф мөхәббәт хистәре.
Көслө рухлы, сабыр, тырыштар
Хәстәрлекле, изгелекле ата-әсә өс балаға ғүмер бүләк итеп, уларҙың һәр береһенә лайыҡлы тәрбиә бирергә тырыша. Иң өлкәне – Илнур Мәләүез кадет лицейында уҡып, армия сафынан һуң дүрт йыл полицияла эш тәжрибәһе туплап, әлеге ваҡытта себер тарафтарын ҡыҙыра. Икенсеһе – Тимур Мораҡ башҡорт гимназияһын гел “4” һәм “5” билдәләренә тамамлаған, хәҙер Ишембай нефть колледжының 4-се курс студенты.
Иң кесеһе, наҙлыһы – Гөлназға хәҙер 10 йәш. Ул Яңы Хвалын урта мәктәбенең 4-се класс уҡыусыһы, өйҙә уҡый, сөнки уға артыҡ йөкләмә ярамай. Гидроцефалия диагнозы менән тыуған сабыйҙы аяҡҡа баҫтырғансы Ҡотлогилдиндарҙың күпме дауахана юлдарын тапағанын, уларҙан күпме сабырлыҡ, тырышлыҡ талап ителгәнен тик үҙенсәлекле бала тәрбиәләүселәр генә күҙ алдына килтерә алалыр.
- Иң ҙур байлыҡ – һаулыҡ, балаларыбыҙҙы шул байлыҡтан айырмаһын! – тип, бер-береһенең ҡәҙерен белеп, балаларының киләсәгенә аҡ өмөттәр юрап, ауыл еренең йәмен тойоп сәмләнеп йәшәүсе Гөлсиә менән Илфат Ҡотлогилдиндарға һоҡланмайынса мөмкин түгел.
