+28 °С
Болотло
ЙӘМҒИӘТ
21 Февраль 2022, 10:50
Бер башҡа үҫтергән дә, сыныҡтырған да - армия
Ватанды һаҡлаусылар көнө яҡынлашып килгән мәлдә, әлбиттә, әрме хеҙмәтен сынығыу, ысын ир-егет ҡорона индереүсе тормош мәктәбе тип һанаған аҫыл йәштәребеҙ тураһында яҙғы килә. Шуларҙың береһе – Мораҡ егете Риф Байғүбәков үткән йылдың 21 октябрендә генә армиянан ҡайтып, әлеге көндә себер тарафтарында дәртләнеп эшләп йөрөй. - Нәҡ армияла үҙеңде бер башҡа үҫкәндәй тояһың, һәр яҡлап сынығаһың. Йәшлектәге ғәмһеҙлекте артҡа ташлап, тормош, яҡындарың тураһында уйланаһың, атай-әсәйеңде нығыраҡ ҡәҙерләргә өйрәнәһең... Хеҙмәт иткәндә дуҫтарың арта, артабан улар менән күрешеп һөйләшеүе, йәиһә телефон аша хәбәр алышыуы бер күңел йыуанысына әүерелә... – ти ул был хаҡта.
Бер башҡа үҫтергән дә, сыныҡтырған да - армия
...Бәләкәйҙән эшкә бөтмөр, уҡыуға әүәҫ үҫмер Мораҡ башҡорт гимназияһын 2016 йылда гел яҡшы билдәләргә тамамлай. Мәләүез индустриаль колледжында технологик ҡоролмаларҙы монтажлаусы һөнәрен үҙләштереп, ҡулына диплом алғас, 2020 йылдың көҙөндә ҙур теләк менән Ҡораллы Көстәр сафына баҫа. Риф Шәрифйән улына Рәсәй гвардияһының эске ғәскәрҙәрендә хеҙмәт итергә тура килә. Яҡташыбыҙ РФ милли гвардия ғәскәрҙәренең көньяҡ-көнбайыш округындағы Жуков ордены менән наградланған махсус тәғәйенләнештәге 33-сө бригаданың хәрби часын һаҡлау бурысын ҙур намыҫ менән атҡара.
Рифтең әлегә эш урыны – Ямал ярымутрауында. Хеҙмәт яланында тәжрибә туплағас, насип булһа, киләсәктә тыуып үҫкән ерендә эшен дә, үҙ бәхетен дә табыр, тип ышанғы килә. Егеттең ата-әсәһе лә - эшһөйәр һәм киң күңелле Шәрифйән Ахун улы менән Әнисә Шәкирйән ҡыҙы улдарына аҡ өмөттәр бағлай. Ә ата-әсәнең өмөттәре, изге уй-теләктәре мотлаҡ бойомға ашырға тейеш!
