+28 °С
Болотло
ЙӘМҒИӘТ
14 Февраль 2022, 06:51
Илем,ерем тиеп йәшәр ир аҫылы
Байтаҡ яҡташтарыбыҙға Ватан алдындағы изге бурысын ҡайнар ҡом сүлдәре һәм шомло тауҙар иле – Афғанда үтәргә тура килгән. Әммә ил сиктәрен, халыҡтар именлеген һаҡларға тос өлөш индергән ил батырҙарының береһе лә Афған ере менән бәйле хәтирәләре менән уртаҡлашырға атлығып тормай. Мең тетрәнеүҙәр, юғалтыу ғазаптарын кисергәнен иҫләп, кемдең генә йәнә йөрәк яраһын ҡуҙғытҡыһы килһен инде?!. Шул һуғыштың шаһиты – Юлдыбай ауылында йәшәүсе Сәлим Хәкимовтан да был хаҡта артыҡ төпсөнөргә ҡыйманыҡ. Уның ҡыйыу йөрәкле Ватан һаҡсыһы икәнлеге хаҡында “Гвардия” һәм “Совет Армияһы отличнигы” түш билдәләре, Афғанда күрһәткән ҡаһарманлығы өсөн юғарынан бирелгән бихисап маҡтау ҡағыҙҙары үҙҙәре үк һөйләп тора.
Илем,ерем тиеп йәшәр ир аҫылы
Сәлим Йәғәфәр улы 1960 йылдың 6 мартында Төпсән ауылында тыуған. Бәләкәй сағынан ҡул менән бесән сабып, колхоз эшендә йөрөп буй еткергән үҫмер Күмертау 1-се мәктәп интернатында һигеҙенсе класты тамамлай. 1977 йылда Стәрлемаҡ ауыл хужалығы техникумының “Ветеринария” бүлегенә уҡырға инә. Бер йылдан әрмегә алынып,халҡыбыҙҙың күпме арыҫландай ир-егеттәрен “йотҡан” афған һуғышының да ҡасафатын үҙ елкәһендә татып, 1980 йылдың йәйендә иҫән-һау ҡайтып инә. Белемгә ынтылышлы егет уҡыуын дауам иттереп, 1983 йылда ҡулына диплом ала. Бар ғүмерен яратҡан һөнәренә бағышлай ул, хаҡлы ялға сыҡҡансы мал табибы булып эшләй.
Тормош һәм хеҙмәт юлын ҙур намыҫ менән үткән афғансының тирә-яҡта кешелекле, егәрле тигән даны бар. Утыҙ йылға яҡын ғүмер юлын бергә-бергә татыулыҡта һәм мөхәббәт-наҙҙа үткән Фәрхәнә Сәйфулла ҡыҙы өсөн ышаныслы тормош юлдашы ла, дүрт балаһы өсөн хәстәрлекле, өлгөлө атай ҙа ул яҙмабыҙ геройы. Матур пар балалары өсөн йән атып, уларҙы һөнәрле итер өсөн бар тырышлығын һалған. Изгелекле ата-әсә һаман да ғәзиздәре һәм ике ейәнсәре өсөн йән атып тора. Күпләп мал аҫрап, баҡса үҫтереп, үҙҙәре төйәк иткән Юлдыбай ауылына ырыҫ, бәрәкәт өҫтәп йәшәй улар.
