+28 °С
Болотло
ЙӘМҒИӘТ
2 Февраль 2022, 07:18
Ышаныслы кеше ине
Уның менән беҙ көн дә тиерлек күрешә торғайныҡ. Яңы һан сыҡҡан һайын редакцияға килеп, гәзит алыр ине. Көҙгөһөн ул күренмәй башланы. Баҡтиһәң, хаҡлы ялға киткән булған. Әммә, ҡыҙғанысҡа ҡаршы, тыныс ҡартлыҡ мәнфәғәтен күрергә насип булмай, аяуһыҙ сир уны баҡыйлыҡҡа алып китә... Үҙе иҫән саҡта гәзит биттәрендә уның тураһында мәҡәлә яҙырға тура килмәһә лә, мәрхүмдәрҙе йылы һүҙ менән иҫкә алыуыбыҙ доға булып, рухын шат ҡылһын ине уның. Нәжип Нәҡип улы Вәлитов 1955 йылдың 13 мартында Бәләкәй Абыз ауылында ябай крәҫтиән ғаиләһендә донъяға килә. Атаһы нәҡип Сибәғәт улы “Октябрь” совхозында төрлө эштә эшләй, әсәһе Зөһрә Фазлый ҡыҙы иһә һауынсы була. Нәжип ағай 1963 йылда Мәҡсүт урта мәктәбен тамамлап, Мораҡ һөнәрселек училищеһында водителдәр әҙерләү курстарында уҡып, ҡулына танытма ала. Һәр ир –егет һымаҡ ил алдындағы мөҡәддәс бурысын үтәп, 1973-1975 йылдарҙа Совет Армияһы сафында хеҙмәт итә. Әрменән ҡайтҡас, район судына водитель булып урынлаша. Унда әҙерәк эшләгәс, район мәғлүмәт – иҫәпләү үҙәгенә күсә. Күгәрсен район прокуратураһына иһә ул 1981 йылда килә. Хеҙмәт кенәгәһендәге ошо яҙма һуңғыһы ла була. 40 йылдан ашыу ғүмерен бер һөнәргә бағышлап, бер урында эшләү бәхетен күрә Нәжип ағай. Аҙаҡ ҡына транспорт бирәләр. Ошо осор эсендә тиҫтәгә яҡын прокурор алмашына. Үҙенең яуаплылығы, таҙа намыҫлы булыуы арҡаһында олпат етәкселәр тарафынан да хөрмәт ҡаҙана. Вазифаһы, һөнәре буйынса ябай хеҙмәткәр булһа ла, был өлкәлә эшләү иң тәү сиратта оло тәрбиәлелек талап итә. Ҡайһы ғына етәксеһе алма, барыһы ла уның тураһында тик йылы хәтирәләр һаҡлай.
Ышаныслы кеше ине
Әлеге прокурор Альфред Ғәлиәкбәров та уны тик яҡшы яҡтан ғына ҡылыҡһырлай.
- Бөтә республика буйынса иң өлкән стажлы водитель ине ул. Уның һымаҡ оҙаҡ йылдар эшләгән кеше булмағандыр. Хеҙмәт юлын башлаған саҡта әле машина ла булмаған, атта йөрөгәндәр. Шул дәүерҙе лә күргән хеҙмәткәр булараҡ ҡына ла ул оло ихтирамға лайыҡ кеше. Унға яҡын прокурор алмашынған ул эшләгән ваҡытта. Ғәҙәттә, яңы етәксе менән бергә водителдәр ҙә алмашына бит инде. Ә Нәжип Нәҡип улы үҙенең таҙа булмышы менән барыһының да ихтирамын, һәм иң мөһиме, ышанысын яулай алған.
Хоҡуҡ һаҡлау өлкәһендә эшләгән кешегә талаптар бик юғары. Әйтергә кәрәк, әгәр тәбиғәттән һиңә ошо өлкәне күтәрерлек холоҡ-фиғел, сифаттар һалынмаған икән, хеҙмәт юлын үтеү үтә лә ҡатмарлы йәиһә бөтөнләй мөмкин дә булмаясаҡ.
Нәжип Нәҡип улы беҙҙең өлкән дуҫыбыҙ булғандыр. Бер ҡасан да хис-тойғоларға бирелеп, артыҡ һүҙ һөйләмәгән, сер һаҡлай белгән, яуаплы, иң мөһиме намыҫлы, көслө ихтыярлы, ғәҙел кеше ине.
Беҙ, уның коллегалары, уны һәр ваҡыт яҡшы яҡтан ғына иҫкә алабыҙ, - ти Альфред Энгельс улы.
Ышаныслы кеше ине
