Йәштәр икеһе лә Аҙнағол ауылында тыуып үҫкән. Ҙур ҡыҙҙары Әмиләгә 11 йәш, ул Теләүембәт урта мәктәбенең 4-се класында белем ала, улдары Илфат – 4-се класс уҡыусыһы. Атаһы Себер тарафтарында эштә саҡта, апаһы менән бергәләп әсәһенә өй эштәрендә лә, мал ҡарарға ла ярҙам итә.
Быйыл көҙ Рәзилә менән Рифат өсөнсөгә атай-әсәй булған – ғаиләләренең йәмен, ҡотон арттырып, йәнә бер ҡыҙҙары донъяға килгән. Ошо көндәрҙә Рыҫмөхәмәтовтар ауылдың “Ихлас” мәсетендә бәпескә Руфина тип исем ататты. Аҙнағол ауылы имам-хатибы Фәрүәз хәҙрәт Яҡупов сабыйҙың әсәһенә Ҡөрьән китабы бүләк итте.
Әйткәндәй, ҡайһы бер сығанаҡтарҙа был исем “алтын сәсле” тигәнде аңлата, бындай исемде йөрөткән ҡатын-ҡыҙҙар көслө рухлы, лидерлыҡ һәләттәре көслө, эшлекле, уңышлы була тиелгән. Әлегә ата-әсәһенең йылы ҡосағында наҙланған Руфинаға бәхетле ,оҙон ғүмер насип булһын!