Ил өҫтөндә һүҙең көслө, ағинәй!

-  “Айыҡ ауыл” бәйгеһендә ҡатнашыу барышында ауыл активының бер йыйылышында уйлап-уйлап ултырҙым да, ауыл хакимиәте башлығы Юлиә Хреноваға  “Башҡа ауылдарҙа ағинәйҙәр ҡоро бар, беҙ ҙә, әйҙәгеҙ, шулайтып ойошайыҡ” тип тәҡдим иттем. Ул инде ҡыуанып риза булды. Шулай итеп, ауыл төркөмөндә иғлан биреп,  әүҙем ҡатын-ҡыҙҙарыбыҙҙы йома сәйенә саҡырҙыҡ. Беҙҙә шул хәтлем дә уңған, оҫта ҡуллы ҡатын-ҡыҙҙар күп. Сәйгә килгәндә  һәр кемеһе күңел йылыһын һалып,  бәлештәр, сәк-сәктәр бешереп, ҡоймаҡ ҡойоп алып килде. Сәй табыны артында һөйләшеп, кәңәшләшеп, эш башларға булдыҡ. Арабыҙҙағы мөслимәбеҙ доғалар уҡып, аят бағышланы.

Идеялар бер-бер артлы яуып ҡына торҙо, әйтерһең дә, шуны ғына көткәндәр.  Иң беренсе беҙ милли кейемдәрҙе барларға булдыҡ. Башҡорт ҡатын-ҡыҙҙарының иң затлы биҙәүес әйбере булып иҫәпләнгән һаҡал, селтәр эшләп тағырға килештек. Был эштә беҙгә ауыл килене Азалия Ишмөхәмәтова ныҡ ярҙам итте. Кис йыйылышып, аулаҡ өйҙә  тәңкә баҫыу буйынса оҫталыҡ дәрестәре үткәрҙек. Унан инде шәл бәйләү өмәһенә саҡырҙыҡ ҡатын-ҡыҙҙарҙы. Белеүегеҙсә, беҙҙә дебет кәзәһен күпләп аҫрайҙар, шәл бәйләү оҫталары өй һайын тиергә була. Төрлө биҙәктәр өйрәнеп, шәл өмәһендә һәр беребеҙ шәл башланы.  Артабан инде “Айыҡ ауыл”  конкурсы сиктәрендә “Һаулыҡ” фестивалендә әүҙем ҡатнаштыҡ. Ағинәйҙәр тирмә ҡороп тороп, милли аш-һыуҙарҙан, ҡул эштәренән бай, сағыу күргәҙмә ҡуйҙы.  Бынан тыш, бер концерттан да, спорт сараларынан да ситтә ҡалманыҡ. Күмәкләшеп Сәйҙә әбейгә ихата таҙаларға ярҙам иттек. Һабантуйҙа ҡатнашыу ҙа үҙе бер ғүмер булды. Дәртләнеп, бергәләп тотонғас,  тирмәләр бәйгеһендә беренсе урын яуланыҡ.

 Киҙеү арҡаһында осрашыуҙар һирәгәйһә лә, тик ятмайбыҙ. Ҡорама ҡорайбыҙ, бәйләм бәйләйбеҙ, аш-һыу серҙәре менән бүлешәбеҙ. Заманға яраҡлаштырып, ватсапта төркөм дә асып ебәрҙек. Ҡапылғара йомош-фәлән төшһә, шунда яҙа һалабыҙ.

 Сентябрҙә беҙҙең ҡор ағзаһы Фәрҙиә Ихсанова улын өйләндерҙе. Кәңәшләшеп,  башҡорт йолаһын теүәл атҡарып, килен төшөрҙөк. Ҡоҙаларға ла, үҙебеҙгә лә бик ныҡ оҡшаны. Киләсәктә лә был эште дауам иткәндә, бик һәйбәт булыр ине, - тип эшләнгән эштәре тураһында бәйән итә Зилә апай