Сәлих ауылы берҙәмлек менән алдыра

  “Айыҡ ауыл” бәйгеһе быйыл да дауам итә. Былтыр үҙ көсөн һынап ҡараған Сәлих ауылы күптән түгел халыҡты йыйып, сход үткәрҙе һәм бер тауыштан быйыл да конкурста ҡатнашырға ҡарар итте. Комиссия рәйесе итеп Тәлғәт Сәлихов һайланды.  Сәлих - ҙур ауыл түгел. Шуғалырмы халыҡ та берҙәм, бер туғандай ҡатнашып, аралашып, хәл белешеп йәшәй. Ололар –ауыл тотҡаһы, йәштәр башлыса ситтә эшләй. Кәртә-ҡура тултырып мал аҫрап, ҡош-ҡорт үрсетеп, баҡса үҫтереп, умартасылыҡ менән шөғөлләнеп, етеш донъя көтәләр бында. Ҡыҫҡаһы, ауылда эш юҡ тиһәләр ҙә, эшһеҙҙәр ҙә юҡ бында. Һәр кемеһе нимә менәндер мәшғүл, һәр кемеһенең килем сығанағы бар. Ҡайһы ғына йортҡа күҙ һалма – төҙөк, матур, бағыулы. Күмәкләгән –яу ҡайтарған тигәндәй, ниндәй генә башланғыс булмаһын, һәр ваҡыт күмәкләшеп тотоналар, әүҙемлеге менән һоҡландыралар:  “Урындағы башланғыстарға булышлыҡ итеү” программаһы буйынса балалар өсөн спорт уйын майҙансығы булдырҙылар. Сәлих ауылы халҡы “Айыҡ ауыл-2021” конкурсында лайыҡлы ҡатнашыр тип өмөтләнәбеҙ.

Сәлих ауылы берҙәмлек менән алдыра