+16 °С
Облачно
ЙӘМҒИӘТ
18 Октября 2021, 11:56
Талаптарҙың үтәлеше – сәләмәтлеккә бер аҙым
Республика, шулай уҡ беҙҙең районда, яңы заман сире менән ауырыусыларҙың һаман да артыуына бәйле, республика Башлығы тарафынан яңы ҡағиҙәләр ғәмәлгә индерелеүе һәм шуның нигеҙендә сауҙа үҙәктәренә, китапхана, кинотеатр, концерт залдарына, музейҙарға ингәндә һәр кемгә вакцина тураһындағы сертификат, йәиһә ПЦР-ҙың кире һөҙөмтәһе хаҡында белешмәне күрһәтеү мотлаҡ икәнлеген алдан хәбәр иткәйнек инде. Ә бөгөндән алып республика Башлығы Указы бөҙрәхана, косметик салондарға ла ҡағыла. Бөгөн санитар-эпидемиологик талаптарҙың үтәлеше өсөн яуап биреүсе урындағы ведомство-ара комиссияһы нәҡ район үҙәгендәге бөҙрәханаларҙа, матурлыҡ салондарында һәм сауҙа нөктәләрендә был талаптарҙың үтәләме-юҡмы икәнлеген тикшереү маҡсатында рейдҡа сыҡты. Был эштә район етәксеһе Ғайса Янбаев та ҡатнашты.
Талаптарҙың үтәлеше – сәләмәтлеккә бер аҙым
“У Руслана”, “Каре”, “Лотос” бөҙрәханаларында халыҡты хеҙмәтләндереүсе персоналдың да, сәс ҡырҡтырырға килеүсе кешеләрҙең дә вакцина тураһында сертификаты барлығы асыҡланды. Ә бына “Персона”салонында сертификатҡа бәйле мәғлүмәтте яңы ишеттеләр булһа кәрәк. Бер нисә бөҙрәхана әллә бикләнеп ҡалыуҙы хуп күрҙе, әллә ысынлап та дүшәмбелә ял итә ине. Район үҙәк китапханаһында был юҫыҡта эш күптән яйға һалынған – бында ингән һәр кемдең температураһы үлсәнә, өлкәндәрҙең сертификаты тикшерелә, бының өсөн айырым мөйөш булдырылған. Тик көнкүреш тауарҙары магазиндары, эре сауҙа үҙәктәре һатыусылары, хужаларының (комиссияның нисәнсегә тикшереүенә ҡарамаҫтан!) ҡайһы берәүҙәре әле булһа етешһеҙлектәрҙән ҡотолмаған, вакцина эшләтергә лә ашыҡмаған.
