Лауреаттар билдәле

.Арҙаҡлы шәхесебеҙҙең 125 йыллығында премияға лайыҡ булыуҙары лауреаттарға икеләтә яуаплылыҡ өҫтәй. Шәһит Әхмәт улының исемен мәңгеләштереүгә, башҡорт журналистикаһын үҫтереүгә индергән өлөштәре юғары баһаланыуҙар менән барыһын да ихлас күңелдән ҡотлайбыҙ! Фекерҙәрегеҙ тос, ҡәләмдәрегеҙ осло булһын! Хеҙмәттәшебеҙ Гөлшат Вәлиеваның эшмәкәрлеге менән район гәзитен уҡыусылар яҡшы таныш. Йөкмәткеле мәҡәләләре, һүрәтләмәләре менән ул үҙ аудиторияһын тапҡан кеше. Премияға лайыҡ булыусыларҙан Рәзилә Ишбулды ҡыҙының хеҙмәтен иһә айырым билдәләп үтмәй булмай. Нисәмә йылдар дауамында Шәһит Хоҙайбирҙиндың ғаиләһенең тормошон, эшмәкәрлеген, ижадын өйрәнеп, ысын мәғәнәһендә оло баһаға лайыҡ хеҙмәттәр авторы ул. "Һүнмәҫ йондоҙҙар" исемле китабы Шәһит менән Маһруйҙың тормошо, эшмәкәрлеге, ғаилә мөхәббәте тураһында булһа, "Сәхнәләрҙән мендең күктәргә" тип аталғаны Шәһит Әхмәт улының ҡыҙы Тамара Хоҙайбирҙина тураһында. Рәзиләнең башлаған эштәре әле бының менән генә бөтмәй, артабан да дауам итәсәгенә иманым камил. Яҡын киләсәктә уның мәҡәләләре район гәзитендә лә, республиканың абруйлы баҫмаларында ла донъя күрәсәк.