Энәк участкаһына ҡараған 41 мең гектар хазинаға күҙ-ҡолаҡ булып ҡына өлгөр! Янғын булһа ла, ағас урланһа ла төп яуапты ул тота. Әммә ишле ғаиләлә тыуып, бәләкәстән ауыл эше менән сынығып үҫкән кеше булараҡ, Таһир Ғәлим улы эшенең ауырлығына һис зарланмай.
- Урманға сығып урамаһаң, тыныс күңел менән йоҡлап та булмай. Үҙенә тартып тик тора, - ти егерме йылдан артыҡ ғүмерен был өлкәгә бағышлаған уҙаман.
Намыҫлы хеҙмәткәр генә түгел, өс балаһы өсөн йән атып тороусы изгелекле атай ҙа, 1997 йылдан бирле тормош йөгөн парлап тартҡан һөйөклө ҡатыны – Филүзә Ҡәйүм ҡыҙы өсөн булдыҡлы ир, ныҡлы терәк-таяныс та ул яҙмабыҙ геройы.