Бында байрам, бында уйын-көлкө...

Кемдәрҙер һабантуйға тамашалар ҡарарға, таныштарын күреп аралашырға килһә, икенсе берәүҙәр төрлө уйындарҙа ҡатнашырға тип юллана. Төрлө-төрлө бәйгеләр, спорт ярыштары уҙғарылған урындарҙа халыҡ, өлкәндәр әйтмешләй, йырып сыҡҡыһыҙ ине: сәмлеләр теге йәки был ярышта ҡатнашып ләззәт алһа, башҡалар улар өсөн янды-көйҙө, сәмләндерҙе, еңеүгә дәртләндерҙе. Үҙҙәренең көсөн һынап ҡараға теләүселәргә һайлап алыу өсөн мөмкинлектәр ҙур ине: милли уйындар менән бер ҡатарҙан байтаҡ ҡына традицион спорт төрҙәре лә уҙғарылды.