Йәшлек – йәшнәп йәшәр саҡ!

Ир менән ҡатын бер булып, тормош йөгөн бергә тартҡанда ғына донъялар алға бара, тиҙәр күпте күргән инәй-бабайҙар. Тәүәкән ауылында йәшәгән Гөлназ менән Руслан Ҡаразбаевтар, сағыштырмаса йәш булһалар ҙа, бына шул хәҡиҡәткә таянып йәшәй. Өс тиҫтәһенә яңы аяҡ баҫҡан әле улар, ғаилә ҡороуҙарына ла әллә ни күп түгел: бары тик ун йыл ғына була – быйыл үҙҙәренең ҡурғаш (алһыу) туйҙарын билдәләргә йыйыналар. Үҙҙәре һымаҡ һөйкөмлө өс бала үҫтерәләр – Наҙгөлдәренә 8, Айгизгә 6, Айбулатҡа 5 йәш. Гөлназ хат ташыусы булып эшләй, Руслан Тәүәкән ауыл-табип амбулаторияһында водитель. Хужалыҡтары ярайһы уҡ ҙур: 6-7 баш һыйыр аҫрайҙар, күпләп ҡош-ҡорт көтәләр, баҡса тултырып йәшелсә-емеш тә үҫтерәләр. -Өйҙәге бар эште лә бергәләп эшләйбеҙ, шуға артыҡ ауырлығы тойолмай. Бейем дә, янда булғас, балаларға күҙ-ҡолаҡ, подписка ваҡытында эшемдә лә ярҙам итә, - ти Гөлназ. Уҙған йыл йәш ғаилә өй һатып алған. Бына шундай тырыш, уңған йәштәр бар беҙҙең Күгәрсендә!