Ҡаһарман яугирҙың ҡиммәтле бүләге

Ике йыл элек кенә ул: “Ҡыҙым, һиңә бүләк”, - тип, тәүге битенә шәхси имзаһы ҡуйылған китабын бүләк иткәйне. “Ҡыҙыл Йондоҙ” һәм ике Дан ордены кавалеры, Бөйөк Ватан һуғышы тарихына һынылыш осоро булып ингән Сталинград алышында Манштейн танк армияһын ҡыйратыуға, Украина, Белоруссия, Литва, Көнсығыш Пруссия ерҙәрен фашизм ҡоллоғонан азат итеүгә үҙ өлөшөн индергән ысын ҡаһарман, Мораҙым ауылының хөрмәтле аҡһаҡалы – Ғаләм Әхмәтғәзиз улы Ҡотлогилдин ҡулынан ҡиммәтле бүләк алғас, ҡыуанысымдың сиге булманы. “Тормош һуҡмаҡтарындағы аҙымдар” тип аталған китапҡа тиҙ генә күҙ йүгертеп сыҡтым да, эш өҫтәленә һалып ҡуйҙым. Илебеҙ һәм райондың йәнле тарихын ҡағыҙға теркәп, баһалап бөткөһөҙ ҙур хеҙмәт башҡарыуына (мина ярсыҡтарын йөрөткән насар ғына күҙҙәре менән!) хайран ҡалыуым тураһында бер шылтыратып фекеремде еткерермен әле, тип уйланым. Олпат юбилейы - 95-нә ҡарай ғорур атлаған, аҡыл-зиһен ҡеүәһе, шәп хәтере, дәрт-ялҡынлы йөрәге менән йәштәргә биргеһеҙ яугирҙы ҡапыл ғына баҡыйлыҡҡа күсер, тип башыма ла инеп сыҡмаған, күрәһең... Редакциялағы был күрешеүҙән һуң ветеран менән осрашырға насип булманы.

Добавить в предпочтительные источники Google