Республика халҡы Әмир Ишемғоловты һуңғы юлға оҙатты

Бөгөн йәмәғәтселек Дәүләт Йыйылышы – Ҡоролтай депутаты, Ҡортсолоҡ һәм апитерапия буйынса ғилми-тикшеренеү үҙәге генераль директоры, Рәсәйҙең атҡаҙанған фән, Башҡортостандың атҡаҙанған ауыл хужалығы хеҙмәткәре, профессор Әмир Миңлеәхмәт улы Ишемғоловты һуңғы юлға оҙатты.

Бөгөн йәмәғәтселек Дәүләт Йыйылышы – Ҡоролтай депутаты, Ҡортсолоҡ һәм апитерапия буйынса ғилми-тикшеренеү үҙәге генераль директоры, Рәсәйҙең атҡаҙанған фән, Башҡортостандың атҡаҙанған ауыл хужалығы хеҙмәткәре, профессор Әмир Миңлеәхмәт улы Ишемғоловты һуңғы юлға оҙатты.

Әмир Миңлеәхмәт улы 61-cе йәшендә пневмония менән оҙаҡ ҡына ауырығандан һуң, баҡыйлыҡҡа күсте. Уның менән хушлашырға яҡындары, туғандары һәм коллегалары килде. Матәм сараһында Башҡортостан Башлығы Радий Хәбиров, Хөкүмәт етәксеһе Андрей Назаров һәм башҡа рәсми вәкилдәр ҡатнашты.

Әмир Ишемғолов 1960 йылдың майында Күгәрсен районының Әлимғол ауылында тыуған. Башҡорт дәүләт институтын тамамлай. Хеҙмәт юлын «Ҡыҙыл байраҡ» кохозында башлай, һуңынан «Өфө» тәжрибә хужалығында өлкән селекционер, артабан малсылыҡ һәм аҙыҡ етештереү буйынса башҡорт фәнни-тикшеренеү институты хеҙмәткәре йөгөн тарта.

«Элита» фәнни-тикшеренеү лабораторияһы директоры вазифаһын башҡара. 1998 йылдан Ҡортсолоҡ һәм апитерапия буйынса ғилми-тикшеренеү үҙәген етәкләй. Киләсәккә юғары маҡсаттар менән йәшәгән уҙамандың ваҡытһыҙ арабыҙҙан китеүе, туғандары, ғаиләһе өсөн генә түгел, Башҡортостан халҡы өсөн дә оло юғалтыу.

Депутат булараҡ, Әмир Миңлеәхмәт улы башҡорт тоҡомло бал ҡортон ҡанундар нигеҙендә һаҡлау һәм яҡлау буйынса мөһим тәҡдимдәр индерә, башҡорт милли кәсебенең мәртәбәһен күтәреү буйынса ҙур проекттарға тотона, төрлө ҡитғаларға таралған милләттәштәребеҙҙе берләштереүгә ҙур көс һала. Замандаштары өсөн Әмир Ишемғолов «бал ҡортонан» да егәрле, әүҙем шәхес, үҙе артынан башҡаларҙы әйҙәүсе лидер булып ҡала.

Гүзәл Борханова.

Читайте нас: