Районыбыҙ, бөтәбеҙ ҙә оло юғалтыу кисерҙек – ҡаты ауырыуҙан арҙаҡлы һәм хөрмәтле яҡташыбыҙ – Мәжитов Рәмил Ғиниәт улы арабыҙҙан бик ваҡытһыҙ китеп барҙы.

Районыбыҙ, бөтәбеҙ ҙә оло юғалтыу кисерҙек – ҡаты ауырыуҙан арҙаҡлы һәм хөрмәтле яҡташыбыҙ – Мәжитов Рәмил Ғиниәт улы арабыҙҙан бик ваҡытһыҙ китеп барҙы. Беҙҙең арала уны белмәгән, уның тураһында ишетмәгән кеше бармы икән? Моғайын, юҡтыр. Уның исеме район халҡына яҡшы таныш, республикала уны бик ихтирам һәм хөрмәт иттеләр. Һәләтле етәксе, хеҙмәт яратҡан, әҙәпле, намыҫлы, кешелекле кеше – ул үҙ ғүмерен тыуған еренә, туған халҡына хеҙмәт итеүгә бағышланы. Р.Ғ.Мәжитов 1957 йылдың 13 апрелендә Үрге Һаҙ ауылында донъяға килә. Үҙенең хеҙмәт эшмәкәрлеген 1974 йылда Мәҡсүт ауыл мәҙәниәт йорто директоры вазифаһында башлай. Совет Армияһы рәттәрендә хеҙмәт иткәс, Үрге Һаҙ һигеҙ йыллыҡ мәктәбендә физкультура уҡытыусыһы булып эшләй. 1978 йылдан 1983 йылға тиклем Стәрлетамаҡ дәүләт педагогия институтында белем ала. Уны уңышлы тамамлап, тыуған районына ҡайта. Яңы Николаевка һигеҙ йыллыҡ мәктәбендә директор урынбаҫары, Волостновка урта мәктәбе директоры булып эшләй. Йәш етәксенең ойоштороу һәләтен һәм үҙ бурысына яуаплы ҡарауын күреп, 1996 йылда Рәмил Мәжитовты Күгәрсен районы халыҡ мәғарифы идаралығы начальнигы вазифаһына ҡуялар. Рәмил Ғиниәт улы мәғариф бүлеген етәкләгән осорҙа белем биреү учреждениеларының матди-техник базаһын нығытыуға, белем биреү сифатын күтәреүгә ҙур иғтибар бирелә. 2003 йылда уны Күгәрсен районы хакимиәте башлығы итеп тәғәйенләйҙәр. Районды ул етәкселек иткән осорҙа хужалыҡтар, предприятиелар, учреждениелар һәм ойошмаларҙың матди-техник базаһын нығытыу, яңы социаль-мәҙәни объекттар төҙөү, иҫкеләрен реконструкциялау, ауылдарҙы төҙөкләндереү буйынса күп эштәр башҡарыла. 2008 йылда инициативалы, етәкселек итеүгә һәм эште ойоштороуға һәләте ҙур булған Р.Ғ.Мәжитовты Башҡортостан Республикаһы Үҙәк һайлау комиссияһы рәйесе итеп һайлайҙар. Тормош тәжрибәһе, оҙаҡ йылдар район менән етәкселек итеүе, тәрән белеме һәм зирәк аҡылы уға республика кимәлендә ҡуйылған бурыстарҙы уңышлы атҡарырға ярҙам итә. 2010-2018 йылдарҙа ул Башҡортостан Республикаһының Мәғарифты үҫтереү институтын, 2019 йылдан Башҡортостан Республикаһының иретеү-монтажлау һәм сәнәғәт етештереү колледжын етәкләй.