Дүрт шатлыҡ бергә

Бөгөн, 9 октябрҙә, З.Биишева исемендәге паркта ҙур байрам – республика көнө, районыбыҙҙың 90, Мораҡ ауылының 250 йыллығы уңайынан ҙур тантана уҙғарылды. Күгәрсендәрҙең шатлығын уртаҡлашырға беҙҙең хөрмәтле яҡташтар – РФ Дәүләт Думаһы депутаты Зариф Байғусҡаров, тележурналист, яҙыусы, шағир һәм драматург Сәрүәр Сурина, Рәсәйҙең атҡаҙанған мәҙәниәт хеҙмәткәре, филология фәндәре кандидаты Әхмәт Искәндәров һәм БР Дәүләт Йыйылышы-Ҡоролтай депутаты Әлфәрис Байсурин килде. Сараны район хакимиәте башлығы Ғайса Янбаев асты, күгәрсенлеләрҙе байрамдар менән ҡотланы, райондың төрлө тармаҡтарында тырышып эшләүселәргә Күгәрсен районының маҡтау грамоталарын тапшырҙы, оҙаҡ йылдар татыу ғүмер иткән ғаилә парҙарын һәм “Күгәрсен районының почетлы гражданы”исеменә лайыҡ булыусыларҙы тәбрикләне. Район халҡын депутаттар – Зариф Байғусҡаров менән Әлфәрис Байсурин сәләмләне, улар ҙа район үҫешенә тос өлөш индереүселәргә РФ Дәүләт Думаһы, БР Дәүләт Йыйылышы-Ҡоролтай һәм БР Мәҙәниәт министрлығының маҡтау грамоталарын, рәхмәт хаттарын тапшырҙы. Ҡотлау һүҙҙәре район мәҙәниәт һарайының һәм үҙешмәкәр артистарҙың дәртле йыр-моңдары, бейеүҙәре менән үрелеп барҙы.