Дүрт байрам бергә...

Ауыл биләмәләре әүҙемдәренең, район үҙәгендә урынлашҡан предприятие, ойошма, учреждениеларҙа эшләүселәрҙең араһында ысын оҫталарҙың күп булыуы нәҡ Республика көнө кеүек оло байрамдарҙа ҡуйылған күргәҙмәләрҙә асыҡ күренә лә инде. Эш мәшәҡәттәре араһында телде йоторлоҡ ризыҡтар бешерергә лә, сәскә-гөлдәр үҫтерергә лә, ҡул эштәре менән булышырға ла өлгөрә улар! Фантазияларына иһә иҫең китер... Республика көнө, Бөйөк Еңеүҙең 75, райондың 90, Мораҡ ауылының 250 йыллығын берләштергән ҙур байрамда З.Биишева исемендәге парк янында һый тулы өҫтәлдәр теҙелде, парк эсендә иһә район музейҙарының, Балалар ижады үҙәгенең, үҙәк район китапханаһының, инвалидтар ойошмаһының, редакцияның һәм Зифа апай Байменованың күргәҙмәләре урын алды. Ошонда уҡ Мораҡ почтамты һәм Күгәрсен мәғлүмәт үҙәге коллективтары ваҡытлы матбуғатҡа яҙылыу ойошторҙо.