Әбейҙәр сыуағында тәбиғәт ҡосағында

Серле көҙҙөң бар матурлығын мең-мең сағыу төҫтәрҙә асып биргән әбейҙәр сыуағы осоронда күңел әллә ҡайҙарға талпына. Был сихри мәлдә алтын тәңкәле шәлен ябынған ҡайындары, тигеҙ сафҡа теҙелгән мәғрур ҡарағайҙары, һуңғы сәскәләре менән арбаған урман-ҡырҙарҙы буйлаһаң, йөрәгеңә көс-дәрт инеп, һулыштарың иркенәйеп ҡалғандай була.- Шундай салт аяҙ көндә өйҙә ултырып нисек сыҙамаҡ кәрәк? Яратам мин урманда йөрөргә, саф һауа һулап, тәбиғәт ҡосағында ял итеп бер аҙ бәшмәк йыйып алайым тип сыҡтым әле лә, - тип ихлас йылмайып ҡаршыланы беҙҙе Әлмәс яғындағы Түләбай ауылы аҡһаҡалы, электән тирә-яҡҡа эшһөйәр зат, балта оҫтаһы булараҡ даны таралған Исмәғилев Рәшит Ғиниәт улы.