Үҙе Сәйетҡол зыяратында, ҡулы Украинала ерләнгән...

Сәйетҡол ауылы уҙаманы Сәғитйән Мөхәмәтйән улы Сәйетбатталовтың баҡый донъяға күсеүенә 15 йылға яҡын ваҡыт уҙҙы. Мөһабәт кәүҙәле, аҡыллы ҡарашлы ветеран аҙ һүҙле, баҫалҡы кеше булып күңелгә һеңеп ҡалған. 26 йәшлек уҡытыусы һуғыштың тәүге йылында уҡ һуғышҡа алына һәм Башҡортостанда төҙөлгән 112-се башҡорт кавалерия дивизияһына эләгә, Әлкә ҡасабаһында ныҡлы хәрби әҙерлек үткәндән һуң, 1942 йылдың апрелендә кавдивизия составында Украина ерҙәрендәге фронт һыҙығына оҙатыла. Элемтәсе булып хеҙмәт иткән башҡорт егетенең яу юлдары ошо уҡ йылдың авгусында өҙөлә. Өҙөлгән элемтәне тергеҙгән бер мәлдә һауала бомба шартлауын ишетеп, аңын юғалтыр алдынан бушлат еңенең киҫәктәргә теткеләнеп осоуы күҙенә салынып ҡалһа ла, уң ҡулының өҙөлөүен ҡыҙыулыҡ менән абайламай. Түләбай ауылынан булған яуҙашы ул госпиталдә ятҡан ваҡытта уның яҡындарына “Сәғитйән ағайҙың ҡулын Украина ерҙәрендә – йылға ярына ерләнем” тип хат яҙа.