Иҫке ауыҙға - яңы аш

Яҙғы үләндәрҙең морон төрткәнен түҙемһеҙлек менән көтөп алмағандар бар микән беҙҙең арала? Юҡтыр. Ул - беҙҙең бала саҡ иле бит ул. Ҡуҙғалаҡ-йыуа ҡалҡыу менән бер тиҫтер балалар талпан-нәмәнән дә ҡурҡып тормай ҡырға сығып китә торғайныҡ. Көтөү ҡаршылаған тау битләүендә элек (хәҙер тап-таҡыр булып ятһа ла) әтләк тә, йыуа ла күп булды. Ҡуҙғалаҡҡа йондоҙлоҡҡа йөрөнөк, шул үҙәнгә төшкән битләүҙә лә йыуа үҫте. Кемуҙарҙан ярышып йыябыҙ, әселегенә сытыймайбыҙ ҙа –шартлата сәйнәйбеҙ. Шыптыр ҙа һалып алғанбыҙ, шунда тултырабыҙ. Ҡайтҡас, әсәй йомортҡа бешереп, үлән турап, ҡаймаҡҡа болғап, салат эшләп бирәсәк. Яҙ еткән һайын бала саҡ иҫкә төшә, нишләптер. Хәҙер ул үләндәр баҡсала ғына үҫеп ултырһа ла, тәбиғәт ҡосағында, ҡырҙа йыйғаны икенсерәк шул. Йыуа йыйған туғайҙар, ҡуҙғалаҡлы үҙәндәр һағындыра. Танһыҡҡа яҙғы үләндәрҙән бер быуа йәшел аш бешереп ашау ғына һағыныу тойғоларын баҫҡандай була. Халыҡта ер таҙармайса, йәғни, тәүге күк күкрәмәйсә, үләнгә тейергә ярамай тигән ышаныс та бар. Хәйер, үлән әлегә бик ҡалҡып та етмәгән, туңдырып алып ҡалған үләндәрҙән булһа ла, йәшел аш бешереп ашаныҡ әле. Рецебы - эстә. Яҙғы үләндәрҙән тағы ла ниндәй ризыҡтар әҙерләргә була - ул турала мәҡәлә тиҙҙән гәзит биттәрендә лә донъя күрер.