Көслө заттарға бағышланды

Аҙнаның һуңғы эш көнөндә район мәҙәниәт һарайында Ватанды һаҡлаусылар көнөнә арналған матур концерт уҙҙы. Ни генә тимә, тамашасылар барыбер ҙә үҙебеҙҙең таланттарҙы нығыраҡ ярата – залда ултырған халыҡтың байтаҡ булыуы шуны дәлилләне. Әйткәндәй, улар араһында 3-4 йәшлек сабыйҙарҙан алып өлкән йәштәге инәй-бабайҙарға тиклем бар ине. Район таланттарын һәм йыр-моң һөйөүселәрҙе бергә туплаған мәҙәни сара район мәҙәниәт һарайының халыҡ тынлы оркестры (етәксеһе – Рәфис Мәүлетҡолов) һәм “Шишмәкәй” балалар баҡсаһы тәрбиәләнеүселәре сығыштары менән башланды һәм “Ҡыҙыл Мәсет” төркөмө башҡарыуындағы “Офицеры” йыры менән тамамланды – йөрәктәргә үтеп ингән һәм хәрбиҙәргә дан йыры булып яңғыраған был йырҙың һуңғы куплеттарын тамашасылар аяғүрә баҫып тыңланы.