Бер яугир тураһында

Бер кем дә, бер нәмәлә онотолмай... Бөйөк Еңеүҙең 75 йыллығы алдынан дәһшәтле һуғыштың башынан алып аҙағынаса батырҙарса көрәшкән яугирҙарыбыҙҙың барыһы тураһында – иҫәнме ул, мәрхүмме – хәтирәләр яңыртырға бурыслыбыҙ.1925 йылдың 8 февралендә Нуҡай ауылында донъяға килгән Рамаҙан Сәхиулла улы Абсалиҡовтың вафатына ла биш йыл ваҡыт уҙған - май байрамына ике көн ҡалды тигәндә генә баҡыйлыҡҡа күсте яугир 2015-тә, иҫән булһа, 95 йәшен тултырған булыр ине.Ябай колхозсы ғаиләһендә тыуып үҫкән Рамаҙан Сәхиулла улы 41-се йылда Иркутск ФЗО-һын тамамлай, 43-тә Байкал аръяғы фронтына 39-сы армия батальоны рядовойы булып яуға инә. Торараҡ уны Волга буйы хәрби округының 11-се өйрәтеү бригадаһына йүнәлтәләр. Шул уҡ йылда ҡыйыу егет 1-се Белоруссия фронтының 102-се уҡсылар полкы командиры ярҙамсыһы булып тәғәйенләнә. Шунда ул дошман пуляһы эләгеп, ҡаты яралана, ярты йылдан ашыу Чкалов госпиталендә дауалана, 1944 йылда икенсе төркөм инвалид булып тыуған яғына әйләнеп ҡайта.