Ил тарихына бер ҡараш

Беренсе бөтә донъя һуғышына ла 105 йыл тулды. Мәңге тынғыһыҙ Европала башланып киткән был яу ялҡыны районыбыҙға ла ҡағылмай ҡалмай. Уның осҡоно һәр ауылға ҡағыла. Һуғыш бик ауыр шарттарҙа бара. 1914-1918 йылдар эсендә генә һуғыш майҙанында 70 миллион яугир алыша. Англия, Рәсәй, Германия, Австро-Венгрия, Италияға Төркиә менән Болгария ла килеп ҡушыла. Был һуғышта райондаштарыбыҙ беренсе тапҡыр авиация менән һауанан бомбаға тотоуҙың, газ ҡулланыуҙың, противогаз кейеүҙең, һыу аҫты кәмәләрендә һуғышыуҙың шаһиты була. Уларға, һуғыша-һуғыша, күп кенә Европа илдәре аша үтергә тура килә. Был ваҡиғаға быуаттан артыҡ ваҡыт үтһә лә, документтары әленән-әле табылып тора. Быйыл сентябрь айында ауылыбыҙҙа йәшәүсе Хәлитова Зәлиә Миңнетдин ҡыҙы үҙенең ата-бабаларынан ҡалған ғәрәп графикаһында яҙылған бер төргәк иҫке ҡулъяҙмаларҙы, туҙған баҫма китаптарҙы бирҙе.Ҡулъяҙмалар төрлө осорҙа һәм төрлө кешеләр тарафынан яҙылған. Шуларҙың 8 биттән торған шиғри ҡулъяҙмаһы үҙенә йәлеп итте. Уның авторы үҙен шиғри юлдар менән Ғабдулла тип күрһәтә. Тарихтан билдәле булыуынса, һуғыш 1 августа башлана, ә Ғабдулла алтыһында алына.