Хоҙайбирҙиндар ҙа хоккей уйнаясаҡ!

Хоҙайбирҙиндарҙың ҡыуанысын уртаҡлашырға район хакимиәте башлығы Ғайса Янбаев, район Советы рәйесе Айрат Болғаиров, РФ Дәүләт Думаһы депутаты Зариф Байғусҡаров, БР Дәүләт Йыйылышы-Ҡоролтай депутаты Әлфәрис Байсуриндар килде. Ҡунаҡтар ауыл халҡын иҫтәлекле көн менән ҡотлап, яңы хоккей ҡумтаһы, спорт-уйын майҙансығының ауыл халҡына оҙаҡ хеҙмәт итеүен, майҙансыҡтың буш тормауын теләне.

“Урындағы башланғыстарға булышлыҡ итеү” программаһын тормошҡа ашырыуҙа әүҙемлеге өсөн ауыл биләмәһенең Рәхмәт хаты менән Рауил Яппаров, Вәсилә Әмирова, Рәмил Әмиров һәм Ришат Әминевтар бүләкләнде.

Даими ярҙам иткәндәре өсөн район хакимиәтенең Рәхмәт хатына Ингиль Иҫәнғолов менән Ренат Хоҙайғолов лайыҡ булды.

Ҡотлауҙар, сығыштар “Бесәнсе” фольклор ансамбленең дәртле йыр-моңдары, балаларҙың шиғыр-йырҙары менән үрелеп барҙы. Ауыл халҡының шатлығын уртаҡлашырға – яңы асылған хоккей ҡумтаһында дуҫтарса осрашыуға килгән Теләүембәт ауылының хоккей командаһы уйынсыһы Руслан Фазлаев үҙенең йырлы күстәнәсе менән күңелдәргә дәрт өҫтәне.

Тантаналы өлөштән һуң Хоҙайбирҙин, Теләүембәт һәм Ҡалдар ауыл командалары араһында ҡыҙыу ярыштар башланды.

Хәҙер ауылдарҙағы шарттар ҡаланыҡынан һис ҡалышмай. Ҙур итеп эшләнгән хоккей кордында рәхәтләнеп ҡышын конькиҙа шыуырға, хоккей уйнарға, йәйен иһә баскетбол, волейбол ярыштары үткәрергә мөмкинлек буласаҡ.