Эшһөйәрҙәр төйәк иткән йәмле төбәк

Мораҙым, йәиһә Юлдыбай яғына барғанда юл өҫтөндә ҡалған Яңы Хвалын ауылынан күпселек елдереп үтеп китергә тура килә. Дөрөҫ, төбәккә йәм бөркөп йәшәүсе йәш ғаиләләр, матур парҙар менән уҡыусыларыбыҙҙы таныштырғаныбыҙ бар. Был юлы эш сәфәребеҙ мотлаҡ был ауылға туҡталып, баҫмаларға яҙылыу осоронда хвалындарҙың тын алышын белеү, шул йәһәттән әүҙемерәк дуҫтарыбыҙҙы асыҡлау маҡсатына нигеҙләнде. Бәхеткә күрә, аяҙ көндө йәшен атҡан кеүек алдарында пәйҙә булып, таң менән тыныс донъяларына “ҡул һуҙыу” берәүгә генә оҡшаманы, ә башҡа ябай ауыл кешеләренең киң күңелле, донъяға яҡты ҡарашлы, ижади хеҙмәт кешеләренә ихтирамлы булыуҙары һис көтөлмәгәнсә ғәжәйеп ҙур ҡыуаныс булды. Кешелеклелек, мөләйемлек сифаттары вазифаға ла, кеҫәңә лә ҡарамай шул, улар – ҡандан, тәрбиәнән һалына, ябай һауынсы, ябай ветеринарҙың мәҙәни кимәле йыш ҡына урынлы эштәге кешеләрҙекенән дә юғарыраҡ булып сыға... Ғүмерҙәрен ветеринария өлкәһенә бағышлап, хәләл көс менән тапҡанына шөкөр итеп, эштән бәхет биргәненә яҙмыштарына рәхмәтле булып, тормош ауырлығына һис зарланмайынса сәмләнеп йәшәүсе һәм өҫтә яҙып үтелгәнде үҙ өлгөһөндә иҫбатлаусы Флүзә һәм Йондоҙ Вәхитовтар - ифрат һоҡланғыс кешеләр. Йондоҙ ағайҙы электән ишетеп белә инем, уның матур ғаиләһе менән яҡындан танышыу күңелдә йылы, яҡты тәьҫораттар ҡалдырҙы. Өҫтәүенә улар - оҙаҡ йылдар буйы баҫмабыҙға тоғро ҡалыусы әүҙем уҡыусылар. Район һәм ауылдарҙа ҡайнаған тормошҡа битараф ҡала алмай шул үҙҙәре тынғыһыҙ хеҙмәттә һыналғандар!