Ултырыштар – башҡорт телендә

Үткән аҙнала район хакимиәтендә ауыл биләмәләре вәкилдәре ҡатнашлығында “Берҙәм Рәсәй” фирҡәһенең сираттағы ултырышы үтте. Ауыл ерҙәренең биш йыллыҡ комплекслы үҫеше, күп ҡатлы йорттарҙың подъездарын, ишек алдарын төҙөкләндереү, “Айыҡ Башҡортостан” республика проектын тормошҡа ашырыу, матбуғатҡа яҙылыу һәм партия эшмәкәрлеген байҡау, балалар өсөн урам футболы фестивален ойоштороу буйынса уҙған был кәңәшмәнең бер әтнәкәһе бар. Ул да булһа уның башҡорт телендә үтеүендә. Эйе, яңылышманығыҙ, башҡорт телендә. Ултырыш саф башҡорт телендә барҙы, сығыш яһаусылар ҙа, тәҡдимдәр индереүселәр ҙә, һорау биреүселәр ҙә – барыһы ла башҡорт телендә сығыш яһаны. Әлбиттә, тәүҙә нисектер ситен һымағыраҡ тойолғандай булды: рәсми кәңәшмәләрҙе, ултырыштарҙы рус телендә үткәреүгә ғәҙәтләнгәнбеҙ, залда бер генә рус милләте вәкиле булһа ла, вата-емерә булһа ла, русса һупалауҙарға күнегелгән.