Бөтә яңылыҡтар
ЙӘМҒИӘТ
8 Октябрь 2018, 19:01

Зирәктәр ярышы уҙҙы

Яңауыл клубында Ололар көнө һәм Ишбулды Буранбаевҡа 60 йәш тулыу уңайынан шахмат турниры ойошторолдо. Ишбулды Бикмырҙа улы әүҙем шахматсы, күп шахмат ярыштарында ҡатнашып, еңеү яулаған кеше. Физик мөмкинлеге сикләнгән спортсылар араһында ул район данын яҡлап сығыш яһап, шашка һәм шахмат буйынса төбәк һәм республика ярыштарында күп тапҡырҙар призлы урындар яуланы.

Ярышҡа район шахматсылары ғына түгел, күрше Ейәнсура районынан һәм Ырымбур өлкәһенең Нововороженск ҡасабаһынан да килделәр.
Сараны район хакимиәте башлығы вазифаһын ваҡытлыса башҡарыусы Азамат Сәйфуллин
һәм район хакимиәтенең йәштәр эштәре, спорт һәм бәлиғ булмағандар бүлегенең баш белгесе Артур Әбдрәхимов асты. Ярыш секретары, “Иртөбәк” физкультура – һауыҡтырыу үҙәге тренеры Айнур Хәйеров уйын ҡағиҙәләре менән таныштырҙы.
9 турҙан торған ярыш һиҙелмәй ҙә үтеп китте. Иң күп мәрәй йыйған Йәүҙәт Әбдрәшитов (Ырымбур өлкәһе) 1-се, Айнур Хәйеров 2-се (Түләбай ауылы), Шакир Хәсәнов (Ейәнсура районы) 3-сө урындарҙы яуланы.
Турнир тамамланғас шахматсылар сараны ойоштороусыларға – район хакимиәтенең йәштәр эштәре, спорт һәм бәлиғ булмағандар буйынса бүлек хеҙмәткәрҙәренә, Ишбулды Буранбаевҡа оло рәхмәт һүҙҙәрен еткерҙеләр.
Сара аҙағында ИшбулдыБикмырҙа улы һәм уның туғандары ярышсыларҙы мул табын артына саҡырҙы.
Радмил ЯҠУПОВ.
Яңауыл ауылы.