Ысын һөнәрмәндәр - "Йылылыҡ селтәре"ндә!

Һөнәри байрамдарын ҡаршылап Булдыҡлы, үҙ ҡулы аҫтында эшләүселәргә ҡарата ихтирамлы булған Василий Смирнов етәкселегендәге “Йылылыҡ селтәре” муниципаль унитар предприятиеһында йәмғеһе 90-ға яҡын кеше эшләй. һәр береһе үҙ бурыстарына яуаплы ҡарап, эшен яратып башҡара. Шуларҙың береһе - алтын ҡуллы токарь Батраев Илсур Константинович (1-се фотола). Ғүмеренең иң гүзәл мәлендә үҙе тыуып үҫкән Ульяновск өлкәһендәге заводтарҙа токарь булып эшләп бай тәжрибә туплап, ғаиләһе менән Күгәрсен еренә күскәс (икенсе яртыһы - Елена Васильевна тыумышы менән Яңы Николаевский ауылынан, “Шишмәкәй” балалар баҡсаһында тәрбиәсе), оҙаҡ йылдар төҙөлөш өлкәһендә намыҫлы эш башҡара. Алтын ҡуллы оҫта булараҡ, район үҙәгендә “Уралҡай”, “Күгәрсенкәй” балалар баҡсаһы кеүек ҙур объекттар төҙөүгә тос өлөшөн индерә. Ә “Йылылыҡ селтәре” предприятиеһында эшләүенә хәҙер биш йыл.