Сара 17 сәғәт 30 минутта башлана, тип хәбәр итә Башҡортостандың Ғаилә, хеҙмәт һәм халыҡты социаль яҡлау министрлығының матбуғат хеҙмәте. Изге Троицк кафедраль соборы эргәһендә ижади оҫталыҡ дәрестәре, уйын күнекмәләре, йәрминкә һәм фестиваль ойоштороласаҡ. Бөрөләр, ҡала ҡунаҡтары һөнәрселәр менән таныша, уҡ атырға өйрәнә, милли аш-һыуҙы, эсемлектәрҙе ауыҙ итә ала.
Ҙур ғаилә байрамы сәхнәһендә дәүләт наградалары – “Әсәлек даны” һәм “Ата-әсә ҡаһарманлығы” миҙалдары – тапшырыласаҡ. “Мөхәббәт һәм тоғролоҡ өсөн” миҙалы менән оҙаҡ бергә йәшәү өлгөһө күрһәткәндәр бүләкләнәсәк. Әйткәндәй, республикабыҙҙың барлыҡ ҡалаларында һәм райондарында Бөтә Рәсәй “Йыл ғаиләһе” конкурсының төбәк этабында еңгәндәр ҙә әлеге фестивалдә ҡатнашасаҡ. Бындай сара Рәсәй Президенты Владимир Путиндың май указдары нигеҙендә барлыҡҡа килгән “Демография” милли проекты бурыстарын да тормошҡа ашырырға ярҙам итә.