Бөтә яңылыҡтар
МӘҘӘНИӘТ
5 Август , 15:24

Композиторҙы һағынып...

Йыл һайын емеш-еләк ваҡыты еткәндә күренекле башҡорт композиторы Юлай ағай Моратовты һағынып иҫкә алам. Вафатына ҡарасайҙа 7 йыл тула. Ярты ғүмерен мәғариф өлкәһенә, башҡорт моңона бағышлаған композиторҙың йырҙарын Айҙар Ғәлимов, Фәрүәз Урманшин, Гөлсөм Бикбулатова, Алһыу Бәхтиева, Иҙрис Ғәзиев кеүек күренекле сәнғәт әһелдәре башҡара. Үлемһеҙ ретро йырҙар авторының ғаиләһе лә ишле була. Ҡатыны Айһылыу Солтан ҡыҙы менән 10 бала ғүмер биреп, башҡорт моңона ғашиҡ уҙаман барыһына ла музыкаль белем бирә. Ни өсөн нәҡ еләк ваҡытында иҫкә төшә тиһегеҙме? Юлай ағай емеш-еләк ваҡытында ғаиләһе менән ҡырҙа еләк, сейә тиреп, бер юлы ҡайнатып алып ҡайта торған булған. Тәбиғәтте яратты. Үҙенең бер хәтирәһендә ул былай тип яҙа: “2002 йылда велосипед бүләк иткәс, башҡа килгән тәүге уй – сәпит менән Өфөгә барып ҡайтыу булды”.  

Композиторҙы һағынып...
Композиторҙы һағынып...

 

“Әгәр бер нәмә тураһында гел хыялланаһың икән, тимәк, был һиңә кәрәк. Иң мөһиме – башлау. Кәрәк-яраҡ исемлеген төҙөйөм: палатка, котелог, ҡулдан яһалған йоҡо тоҡсайы... Ун дүртенсе август иртәһендә ҡатынға әйтәм:

- Тор, мине юлға оҙат...

- Ә? Ниңә? Ҡайҙа?..

- Өфөгә барам...

- Машиналамы?..

- Велосипедта...

- Иҫәр...

Мин башҡаса яуап та көтмәгәйнем. Әммә мин Карлос Кастанеданы уҡыным һәм бар көсөмә үҙемдең мөһимлек тойғоһон баҫырға тырышам. Был беҙгә ҡыйынлыҡтарҙа тыныс ҡалырға ярҙам итә. Кастанеда әҫәрҙәрен мәктәп программаһына индерер инем...” – тип яҙа ул сәйәхәт башлауы тураһында.

 

Шулай итеп, 2004 йылдың 14 авгусында ул велосипедта Өфөгә ҡуҙғала һәм ғүмеренең эсендә ошо юлды 5 тапҡыр үтә.

Ябай ғына кеше лә үҙ хыялдарын тормошҡа ашыра алағанлығын иҫбатланы Юлай ағай. Тәүҙә күңелдә хыял ярала, ул уй-ниәткә әйләнә, ниәт  иһә ярты ғәмәл тип юҡҡа әйтмәйҙәр.

Автор:Айгөл Айытҡолова
Читайте нас в