+28 °С
Болотло
МӘҘӘНИӘТ
18 Май 2022, 06:45
18 май – Халыҡ-ара музейҙар көнө
Әлеге көндә районда өс учреждение – Күгәрсен тарих-тыуған яҡты өйрәнеү, Шәһит Хоҙайбирҙин һәм Зәйнәб Биишева музейҙары уңышлы эшләй. Уларҙан тыш, мәктәп, мәғариф учреждениелары һәм шәхси музейҙар ҙа бар... Күгәрсен тарих-тыуған яҡты өйрәнеү музейына 1979 йылда уҡ нигеҙ һалына. Был эште фин һәм Бөйөк Ватан һуғыштары ветераны Ҡәйүм Халиҡ улы Йәһүҙин үҙ өҫтөнә ала. 1979-1980 йылдарҙа “Хәрби дан бүлмәһе” булараҡ эш башлана. 1981 йылда рәсми асылған “Күгәрсенлеләрҙең хәрби һәм хеҙмәт даны музейы” район мәҙәниәт йортоноң икенсе ҡатында урынлаша.
18 май – Халыҡ-ара музейҙар көнө
1984 йылда иһә ул икенсе бинаға – 1918 йылда Мораҡ ревкомы һәм Ҡыҙыл Армия штабы урынлашҡан тарихи бинаға күсә. 1990 йылда тарих – тыуған яҡты өйрәнеү музейы исемен ала. 2007 йылда район музейы яңы асылған бинала – Балалар ижады үҙәгенең беренсе ҡатында урын ала.
Музей директоры булып төрлө йылдарҙа Ҡ.Х. Йәһүҙин, Г.Ш.Һатыбалова, Ф.Х. Абдуллин, А.Х. Сәлихова, С.А. Ғайсин, Р.М. Исмәғилова эшләй. 2006-2020 йылдарҙа музейға Ғәфүрә Миңнулла ҡыҙы Әбделмәнова етәкселек итә. Ул Күгәрсен районында “Үлемһеҙ полк” акцияһын башлаусы һәм уның координаторы ла булып тора, үҙ эшенә бар күңелен һалған директор ғүмеренең һуңғы көнөнәсә район тарихын байытыуға көс һала. Бөгөнгө көндә музейҙы район башҡорттары ҡоролтайы рәйесе, “Үлемһеҙ полк” хәрәкәте координаторы Рөстәм Миңғәли улы Сәйетбатталов етәкләй.
Туйөмбәттәге З.Биишева, Хоҙайбирҙин ауылындағы Ш.Хоҙайбирҙин музейҙары арҙаҡлы яҡташтарыбыҙҙың исемдәрен мәңгелләштереү маҡсатында төҙөлгән. Тәүгеһен - Зәбирә Кәримова, икенсеһен Динара Әминева етәкләй.
Бынан тыш, төрлө мәктәптәрҙә, балалар баҡсаларында музейҙар эшләп килә. Ике-өс йыл элек–Ялсы ауылында Советтар Союзы Геройы Фәттәх Шәмғоловҡа арналған музей асылды.
